Nu vasala, vasala, muna dōrgō aizjyuras draudzine! Pi reizes ari šamīnes vysas munas leidzjyutējas Janeite, Valeite, Faneite, Anceite, Jugaseite, Kolneju Ļoneite, Pļōpu Pītereit i visi citi munu grōmotu laseitōji i gaideitōji! Grybu Jyusus nūmīrynōt: naasu ni propuluse, ni pi Pītera aizgōjuse.
Nu tō vysa myužeigō skaistuma, kas te vysapleik, rūka vaira nasaceļās raksteit, dōrgiņkī! Nu tim breinumim, kas te myusu zemeitē nūteik, muns smedzeņu kapturs laikam ar šērvi aizaudzis, naspēj tō vysa cauri izlaist. Kas tūs sarepējušūs kvāpus vecelei izšaravōs? Vīņ mute atsaver vaļā i cīti jū griuši dabōt.
Pazar, otkon myužeigs skaistums kai cyrks: gudreibas beņči kōrtejū vaļdeibeņu štukoj, ministru portapeļus dola. Kotru vokoru teļavizerī kai šovu gaidi. Itū reizi jenotibisti speitejās. Zose soka: bīzūs portapeļus grib. I jaunais premjārs vēļ nav eisti īcalts.
Oi, Ceceit, a te vēļ i prezidenteņš sašvakōja. Nu i kas, ka jauns? Jaunūs kvorobas gōž vairōk nakai vacūs. Doktori stōstēja, ka nazkaida tī lipeiga šlipse jam pīsamatuse. Da sirds darōpōjuse. A Zose (gaišreģe atsaroduse!) par Vējūneiti izreiz saceja: nūplāškavōts. Kaids tī breinums. Pazar, gazetōs i teļavizerī: kō tik čaravnīki tī nadora. Ančikristu to da besa, dēļ tō i čaravnīku ka mudž.
Moš prezidents sovu pili pēc guņsgrāka i pēc remonta napaspēja īsvēteit? Lyugsimēs, mōseņas, brōleiši!
Svādines reitā radeja laide ziņu: vīns propesors, nazkaids antis-pologs asūt rakstejis sviterī, ka pi plāškavōšonas varātu byut rudmīse nu jenotibys rūku dalykuse. Edzj, kur bejušais — Zatlereņš pa šai dīnai vōrguļoj..
Kura? Ceceit, tī augšā tikai vīna ryža grūzōs. Nu tei poša lopsa, kura sōkūs Laimes dūtū par premjārīni pataiseja, iz byudim sumynōja, pēčōk jōs dīnas atvīglōja, poša tū nostu iz sovim placim kraut gribēja. Tei, kura jaunuli junkurānu pažālōja, nu gryutōs deputata nostas atpestēja, poša jō vītā saimā īsasāda. Tei poša, tei poša, kura ar peņsineru piketu Reigā skaiški kai opūgs sazadzīdova: “Ū-ū! Ū-ū!”
Myužeigais skaistums, muni dōrgiņkī!
Byusit vasali!
Plōciņu Mase
2016. goda 24. janvarī Rāznē
P.S. Par casnāgim naaizmērstit: ēdit voi kārmynūs leidza nosojit, voi koklā karit: nu plāškavōšonas paleidz. Nacyuku grips ari jau klōtyn…
Pl. M.
Komentāri