Ceciļ! Viņdīn eimu iz Dzota tērgu. Gribēju pi Maksima pakša kaidu vītejū ūgu nūpērkt. Tī kotru reitu kai zvērbuleiši satupuši seikī tērdzinīceni, Tekleite, Maruseite, Feleite i citi ar sovu rūku laseitom ūdzeņom, sēneišom, zōleišom. Kaidu kapeiceņu grib nūpeļneit. Verūs. Myužeigs skaistums! Iz tō paneļa — nivīnas dzeiveibas. Kai smērčs progōjs. Viņ iz Maksima lūga taidu baili īraugu, kur raksteits: par tupēšonu pi Maxima pakša strōpe — 50 juri. Kur ta itim nabadzenim tūs jurus jimt? Rozbāguši. Gōju meklēt Latvijas ūgu ci ōbuli tamā rekastrētajā tērgā, īvastūs tomatu, ogūrču, kābaču mežā. Dōrgiņkō, kas tī vītejū preci atrass! Puļgeņce saceja, ka vajagūt ogūrci voi tomatu pi lipeņas ar nogu pakaseit i paūšņōt. Vītejū smoku varūt sajust. Kur ta vysu tū lārumu apūsteisi? I kas tev, vecinei, ļaus ap kotru preci grōbsteitīs! Paļdis Dīvam, tūs palātku golā īraudzēju pōrs sovas draudzines pi jaunim dēļu goldim. Myužeigs skaistums! Soldonus streipainus tomateņus pi Tekleites nūpērku, napaūstējuse! Bryuklineites tī ari beja! Žāļ, ka tī gaļdeni taidi skoborgaini, ni ēvelēti, ni šmirgelēti. Nu palīkamīm dēlim aba “poddonim” sasysti. I beņčeiša naredzēju, iz kō vōrgajai Tekleitei atviļkt elpu ci sumceņu nūlikt. “Nikas, nikas,” jei soka. “Atnesšu goldautu, beņča vītā kaidu kasti atrasšu..” Leidza taburetku kotru reitu nest jai pagryuši. Verīs biļdē, kaids breineigs tys myusu Rāznē ekskļuzivs. Myužeigs skaistums!
PLŌCIŅU MASE
Puļgeņces biļdes
Komentāri