Muni dōrgiņkī! Vīņdīn brīnu pa sasōleitū snīga putru iz tērgu i purpu pi seva, ka botus sōļs saēss, kai pi jaunim tikšu… Sateiku Vausi Ontiku. Pīmini? Reņas dāls, gudrinīks. Myužeigs skaistums! Jys maņ pylnu golvu pīrunova. Vuicēja, kai depektu par epektu pōrvērst. Ka sasōleitī boti izreizi nav jōsvīž ōrā. Tys sōļs ass cīši lobs. Kod izkaļss zōboki, sōli vajagūt nūkaseit i kukņā nūlikt. Nūderēs gryutōkūs laikūs. Dokters Vauss maņ vasalu vuiceibu nūrunova: “Sōļam iz trotuarim un īlom ir miļzeigs lobums, kai ņiu soka — boņuss. Astmas i vysaidu cytaidu dusuļu pīmaklātim vōjinīkim vaira nav jōmeklej sōļa ustobas. Tān, Maseit, pi veseleibas var tikt par veļti — brodojūt pa sōleitū snīga putru voi keiseli. Es Tev soku, stuņde taidas brisšonas atsver treis nedeļas slimineicā! I soki vysulelōku paļdis piļsgolvai, ka pīkryta paratynōt kaiteigū sētnīku sugu. Tīt tak tū sōli kai ar mēli nu panelim laizeja. Viņ žāļ apteku i ōrstu — plaušinīku. Ka tik napalīk bez dorba i maizes kimūsa. A cytaižōk slava īlu sōleitōjim, Maseit!” Tai ka, muni dōrgiņkī i dōrgiņkōs, veļti napurpit i namaitojit nervus! Ar prīcu brīnit pa snīga putru un esit vasali!
Jyusu PLŌCIŅU MASE
2019. goda 15. janvarī
Komentāri