Vasaliņka, Ceceit, muna dōrgiņkō! Pi myusu – vēļ vīns myužeigs skaistums itamā divanu izoļatorā! Nu 12. maja bez uzpurnim busūs braukt vairs navar. Laikam jau tymūs krūņa vērša bulleiši rozaplidējuši.
Myusu gudreibas beņčeiši tī augšā, sovūs izoļatorūs, lobōk redz, kai myusus vasalōkus padareit, kai nu tō 19. kōvīņa paglōbt. A nu Kinas tak vasalu aeroplanu ar tom maskom atsyutejuši. Na jau par veļti.
Zose soka: a pi myusu tys vazums nakust: mirēji kaidi nikaidi padsmit. Da i slymūs vēļ tyukstūšas naasūt. Kur tōs maskas pēčōk liks? Viņ, ka čigonūs, kod Zīmassvātki atīs… A tī kineišu uzpurneiši to lobu naudeņu moksoj. Par vīnu gobolu, kas derūt vīnam braucīņam autobusā, vasals vīns jurs jōatdūd. Ceceit, kur ta myusu ļauteni itamā bezdeišonas laikā tūs jurus lai jem? Myužeigs skaistums!
Es to sovom draudzinem soku: “Lobōk pērcit, dōrgiņkōs, maizeiti, a uzpurņus pošas nūveikšit, odit, tamburejit, strākalejit. Vaļdeibeņa atļōve dekoratorus lītōt.
Zose živai apsasvīde: jau strākalej nu vacom lupotom, soka: “Bizņess!” Mani pasauce par kompanjonu. Pi “Makša” pakša pastōvēsim. Es par divu metru apleicīni pareklamēšu itū depicitu. Vys jau kaidu kapeiku nūpeļneisim.
Nazakuražejit, munas dōrgiņkōs Ases, Mases, Jugases! Gols golā pameklejit lupotu maisūs unuku yuzeņas aba trusikus. Zose sovā Fui – Bakā izroka itū metodu. Ar prasu sātā izdezinpekcejit, jemit leidza, pi autobusa maucit golvā i braucit vasalys! Kod izkōpsit, paveļcit gumeju tik iz augšu nu zūda, aizmetit aiz pakauša, i kepka voi bublička gotova. Myužeigs skaistums! Divi vīnā! Ni krūņa vērss mutē tiks, ni sauleite pēčōk pakausi karsēs. Edzj, kaida tei myusu inovōceja, Cecileit, itamā “breineigajā” laikā.”
Jyusu PLŌCIŅU MASE
P. S. Puļgeņce vēļ īteice cičturus. Pazar, vasali divi uzpurneiši izīs. Myužeigs skaistums!
Pl. M.
Zoses pošbiļde
Komentāri