Ceceit, dōrgiņkō! Ka jau tu tai soki, to šmuka jau šmuka myusu Rāzneite. Vari pa gobolu ļubavōtīs. Mes to jau tepat i bez uzpurneišim varim pagūļōt pa nūmalem, kur ļauteni nasačupoj. I pōri Rāznes rūbežai pōršaunom. Viņdīn ar Zosi aizvāzōjom iz cytu pusi, naradzātu.
Myužeigs skaistums! Zose kai īslēdze catūrtū ōtrumu, kai reaktivīs samoļots aizatesēs, sūļus skaiteidama. Šei izpētējuse, ka norma asūtj 10 tyukši sūļu dīnā. Kur ta maņ leidza tikt, mēli izkōrušai. Atmešu ar rūku. Lai jūž, voi ta maņ žāļ. Maņ gona ar tim pošim pōrs kimetrenim, kū nūstebereju. Puļgeņce pavuiceja: “Kai mugora slapņa, tai gona.” Tai i darēju: pagrīžu iz sātas pusi, pōtorus skaiteidama. Zose ar sovim 10 tyukstūšim mani jau pi sātas pakša dadzyna. I stōsta aizagiudama, ka tikpat kai cytā pasaulē īkleiduse, ka nazynomus objektus redzējuse. Ni to jurtys, ni to blindažys, ni to muntanteitu kūrmuļu rokumus, ni to piramidonus. Aiz pōrbīļa volūdeņa raustōs.
Myužeigs skaistums! A moš tī cytplanetari pādas atstōjuši voi sovu aero-dronu sataisējuši? Bizņess, Ceceit! Ekskļuzivs maršruts! Var oreņ-teišonu taiseit, var turistus vodōt. Eiriceni ripinies!
Ļauteni, meilī, moš jyus kū ta zinit par itū zīmeļu pīrūbeži i tim objektim, mudri rokstit. Dzeļzs jōkaļ, cikom korsts.
Plōciņu Mase
2020. goda 24. majā
Zoses biļdes
Komentāri