Vasaliņka, muna dorgiņkō Cecileit! Kai redzi, vēļ asu dzjuža, ka rokstu. Myusu Mōras zemeiti Dīveņš sorgoj. Tu tak redzi tūs pasauļa ciparus, krūņa vērša uperus. Myužeigs skaistums! Mes pyrmī nu ūtrō gola! Casnāgus i kārmynūs, i mōgā, i nōsīs i pa visim koktim bōzlejam. I bez problemu! I vīns ūtram klōtu ņi ņi. Mes ar Zosi i Puļgeņci tikpat kai vīna saimisteiba. A vīnai saimisteibai atļauts sūplōk byut. I Puļgeņceite myusus pa laikam izceļ. Myužeigs skaistums Rāznes svātki beja! I Vipiņā, i centrā, i myusu zīmeļu stadionā ciļvēceņus lustynōja ar muzyku i jauneibas laiku dzīsmeitem. Kōjas tai i cylōjōs. Iz atvodom kai kulaks iz acs beja dzīsmeite “Ai, bailes, bailes, ai, nōves bailes spūceigi, jūceigi stōv..” Myužeigs skaistums!
Myužeigs skaistums nupat beja – peņsineru rudiņs “trikmīņs”. Kaids tī trikmīņs, kod vīnam nu ūtra divu metru distanceja, tod cīši i napatusēsi.. Dēļ tō Ražas izstōde. Varēja ar sovim uražajim pasadyžōt. Seniorim, myužeigs skaistums! Zalta rūceņas, zaļi pērsteni! Ka jau karantins, ka jau nikaidas tusas, bez baiļu varēja vysu vasareņi sovu zemeiti rušinōt. I sovus tomatus, arbuzus, batviņus, grīziņus i kū tik vēļ ščupinēt.
A tys rudiņs trikmīņs beja myusu zīmeļu kuļturas pilī! Nazkodejā slavonō pīna kombinata kuļturas nomā. Oi, niuļa tys klubs pōrsavērts leidz napazeišonai. I nu īkšīņs, i nu ōrīņs. Kai piļs! Dvors leidzons kai golds. Celeni gludi, beņčeiši, breineigas instaļaces, ni ocu atraut. I lukturi, i zonti i šveicars kūti pacēls. Myužeigs skaistums!
A īškā – vysaidi zaly, dēļ lelīm i mozīm. Nazkeida keidzona, kur par 5 voi 10 jurikim vysu dīnu var bārni kaiteitīs.
Tam senioru pasōcīņam beja ari ekskļuzivs. Škēršļu pōrvarēšona iz taisnō ceļa.. Žāļ, ka nabeja leita. Veļti Zose tūs kalošus foļvorkā nu čardaka nūcēle… Iztyka itū reizi bez dubļu i kalošu. Gon jau cytā reizē tī kaloši nūderēs, kod iz nōkušū suprātku byus jōbrīn. Cecileit, nadagōjam mes da tōs piļs, munai basanoškai iz tō taisnō ceļa nūlyuza papīds.. I kuļkōjam mes ar Zosi iz sātu, jei ar sovom kalošom, es – ar basanošku ozutē.
Tova Mase
2020. goda 30. septembrī
Zoses biļdes
Komentāri