Vasaliņka, Ceceit, dōrgiņkō! Kai Tu tī sovā Kalipornejā? Vēļ dzeiva? Pi myusu to trikmīņs pēc trikmīņa. Gudreibas beņčeiši sovūs divanūs nūsveiduši par myusim klapatej. Stōda sarokstu pēc saroksta, kū ļaut, kū naļaut ļautenim pērkt. Tai i beja ar tom zečem, zeču biksem, škarpatkom. Tōs laikam beja vyslipeigōkōs, ka aizlīdze tērgōt. Mes ar Zosi jau nūsaprīcōm, škarpatku lōpeišonas biznesi izgudrōm. Sōkom škarpatkas cyravōt. Maņ dīgu i vysaidu dzeiparu da besa. Vacu jaku pīōrdeits i komuļūs pīteits. Gryutōkim laikim. I tu redzi: tei stuņde klōt. Odotas šupletkā gaideit gaidēja. Pazar biļdē. Myužeigs skaistums! Na švaki sagōja. Žāļ, izputēja itei biznese naizreklamēta. Soltums atgōja. I gud-beņči atļōve zečes būdēs tērgōt. Nūsabeida, ka tauta ar apsaļdeitom kōjom propuļs. Kū ta jī vaļdeis, nu kō nūdūkļus plēss, ka ļauteni nu soltuma sōks krist kai myusas nu diklofosa? Oi, Ceceit, i pi šmukuma myusu nalaiž. Ni da prizeru, ni da manekiru. Grib, lai mes peisakus audzejom, lai syltōk smedzeņu kaptureišim. Dreiž bizeites peisim. Viņ baiļa, ka peisakūs var vuts īsamestīs. Tōs i nu nervu varūt pasajōvēt. Kai kara laikā. Myužeigs skaistums! Kū tod dareisim? Dusta vairs nadabōsi, kū motūs īkaiseit kai padumjūs laikūs. Ka saimisteibā ir divi cylvāki, tī vīns ūtram vēļ var ar nazi motus paškūrsteit i tūs insektus izkaut. Ka prass. A ka nā? Zose soka, ka mōjsēžim sātā taipat nav kō dareit. Lai verās kineišus teļapurņūs i kosa sovus koltūņus. Raibī nogi jaunkuņdzem tak gari izauguši. I stypri, ar nazkaidu cītu laku nūklōti kai ar cementu. Nikaida šķēre najem. Puļgeņce rōdēja. Myužeigs skaistums! Cik labi, ka mes ar Zosi pīminim, kai tū vuti vajag īskōt i nūgiutu iz noga kaut. Sprakstēja viņ i reizem ašņis paškeida, kod baba nūgiutu iz noga lyka. Zose īlaiss nazkaidā “barakolkā” pavuiceišonu, kai nu vutu glōbtīs. Palīc vasala.
Tova sprišō Plōciņu Mase
2021. goda 6. febralī
P. S. Oi, Ceceit, a pi myusu nazkaidus četru krōsu ļuksaporus kōrs. Moš Tu zini, kod, kur i kai jī blisinēs?
Pl. M
.
Zoses biļdēs – myusu izputējušais bizņess.
Komentāri