Vasala, muna dōrgiņkō! Cīši nasakuražej, Cecilej! Foļvarceņā vyss pa vacam. Maņce tīpoš komojās. Kū Tu soki? Tova vēstule atpakaļ iz Kaliporneju aizgōjuse?! Myužeigs skaistums! Muna vaiņa, Ceceit. As tok aizmērsu tūreiz, kod tamā Puļgeņces skapī bejom, Tev pasaceit, ka tei dzeravņa Pocelujka, kur foļvarceņa, ir pōrkrysteita. Zam nazkaidas repormas tykuse. Par Jaunīm Cičim voi Cačim pōrsaukta. Myužeigs skaistums! Nu i kas, ka vēsturyska dzeravņa? Vajag tak gols golā latvyskōt. Mūde taida. Nazkod latgaliskōs čyuliskō. Pīmiņ, Viļānus par Vilēniem, Gaļānus par Galēniem, Drycānus par Dricēniem pōrsauce. A niuļa cyta pamža. Kam tei Pocelujevka, ka tī vairs nivīna staravera? Viņ autobusa pīturas stobs palicis, kur jaunīm pōrim pīstōt i papōzeit. Kai nikai – “Bučōtova”, ka nu krīvu mēles pōrtulkoj. Myužeigs skaistums! Napīstōv tak latvīšim taida dzeravņa. A vacumvacū Beveriņu nivīns napīmiņ. I konverti niuļa blūdej pa pasauli. Tai ka naroksti, Ceceit, ar rūku. Koč krutai asūt syuteit ar rūku raksteitas. Puļgeņce soka: tei ir lela gūda parōdeišona. Dēļ myusim, kas te komojās, to sōleita. Pazar, marka moksoj vīnu eiru. Par tū naudu tak maizeites kukuļs i pīneņš saīt ciļvēceņam. Lobōk roksti, dōrgiņkō, internētajā Zosei, Puļgeņce izprinterēs i aizvess iz foļvarceņu.
Tova Mase
P. S.
Ceceit, Tu munus kopōtūs rokstus sajēmi? Daudzim jau padāravōju. Sovim fanim iz bazneicu aiznešu. Nu tak tei krūņa vērša pandele naļaun normala trikmīņa sataiseit. Paļdis Dīvam, nalels cereibas stareņš paspeidēja. Gudreibas beņči koč tūs sertipicētūs ļaun muzejam prīcynōt.
Maņ, Ceceit, tys dokuments ir. Obas ar Zosi aizgōjam, koč mēršonas godi taipat nav tōli. I vēļ Apaļa pamudynōja. Satyku iz īlas. Jau savakceita gōja, līleiga, i soka: “A ka pi dabasu vōrtu papraseis parōdeit sertipikōtu?” Ar tū beja gona. Mes ar Zosi živai jūzem iz “Goru”. Niuļa vyss oki doki!
P. P. S.
Kab nanūglazeit, nasoki nivīnam, ka vakceitīm munas grōmotas prezentēšona muzejā īplanavōta 5. oktobrī.
Pl. M.
2021. goda 15. septembrī
Komentāri