PLŌCIŅU MASE ROKSTA IZ KALIPORNEJU
Par speiti čapaslym lai dzeivoj “Rēzeknes vēsts”!
Cecilija, muna dōrgiņkō! Vasaliņka! Zosja atnese prīceigu ziņu. Šūvosor byušūt lels trikmīņs. Jubilejs. Jōs gazetai, “Rēzeknes Vēstim”, palīk 80! Gondreiž tikpat, cik maņ ar Tevi. Ka vīnu gadeņu atsvīž nūst. Pīmiņ, es Tev jau nazkod raksteju, ka itei avīzeite dīnas gaismeņu 1944. goda 4. augustā, dzeļža cymdu laikūs, “Pa Staļina Ceļu” īt sōkuse, car “pučem” pareizōs ziņas nasuse; par “Ausmu” pōrtapuse; pēčōk “Dorba Karūgu” pacāluse un golsgolā “Rēzeknes Vēsts” kotrā sātā nest sōkuse. Myužeigs skaistums! Bez itōs gazetys, Ceceit, i munu vēstuļu nabyutu. Pyrms 30 godu, 1994-tajā pyrmū vēstuli Tev iz Kaliporneju īspīduse. Lels paļdis itai avīzei par prīceigōm un naprīceigōm ziņom! Bez “Rēzeknes Vēstim” kai bez rūkom daudzi ir palykuši i var palikt. Gudreibas beņčim tōs mozōs avīzes kai taida nazōle pynās pa kōjom. Ņiuļa tak tī teikly, intierneitī, kai zērnekļi pasauli ītynuši. Itei pamža tok kai kūdes, nūāduse avīzeitis. I gazetys vairs nav vajadzeigys. Tai dūmoj gudreibys beņči. Cik tūs kutoru te palics? Cik babeņu, cik dzedeņu? Voi ta jūs kaids skaita? Da myusus seņ nivīns nav skaitējs. Myužeigs skaistums! Dēļ tam tukšu kōrmu da besa! A unuceni i pravnuceni pa ōrzemi perās. I likvidej gādnī gudreibys beņči skūlys, postus i cytys īstōdis. Dēļ kam? Zosja saceja, ka pasauļa bankam nazkaids lels miljonu porōds jōatdūd. Ite jyusmyusejīs Kankareņš daruļavōja, nazkod sūleidams, ka naudys byus tik daudz kai nikod. Myužeigs skaistums! Par speiti vysim čapaslym, lai dzeivoj “Rēzeknis Vēsteitis” i vysiņki laseitōji!
Plōciņu Mase
2024. goda 10. martā
Komentāri