Jo runojam par kulturvēsturiskajom vītom, tod daudzi ir apmeklējuši gon Varakļōnu pili, gon Preiļu pili un tōs parku, kur teik reikōti dažaidi pasōkumi. Šōs obas vītas vīnoj tys, ka tōs bejušas grafu Borhu īpašums. Baroni un grafi Borhi ir sena itaļu izceļsmes dzymta, un šōs dzymtas trejs zori atteistējōs Vōcijā, Pūlijā un Livonijā. Livonijā pyrmī Borhi kolpōja kai Vōcu ordeņa brōli, bet Bernds fon der Borhs beja Ordeņa mestrs nu 1472. goda janvara leidz 1483. goda novembrim. 1583. godā Borhu dzymta īgyva vaļdejumā Varakļōnu nūvodu, kas tyka saukts par “Varkas zemi” (Warkland). Dzymtas pōr-stōvi izacēlēs Pūlijas karaļa militarajā un diplomatiskajā dīnastā, sajemūt titulus un zemes. Nu īpašumim myusdīnu Latvijas teritorijā, kas ilgōku voi eisōku laiku bejuši Borhu vaļdejumā, mynamas Preiļu (Prely), Varakļōnu (Warklany), Marinzejas (Mariensee), Gaļānu (Golan), Siguldas (Segewold), Atašīnes (Ataschen), Stērnīnes (Stirnian), Murmastīnes (Murmelstein), Borkovas (Borchhof), Igates (Idsell, Idselhoff), Keipenes (Kaipen), Vōrkovas (Varkau), Vilcānu (Wiltzan), Pasīnes (Posin) u. c. muižas. Gaļāni Borhu īpašumā atsarodōs leidz 19. godusymta vydum. Muižas pādejō īpašneica nu 1893. goda leidz muižas nacionalizacijai 1920. godā beja Anna fon Engelharte. Šūreiz nadaudz pastōsteisim par Gaļānu muižu. Gaļāni atsarūn Preiļu nūvodā (vēļ pyrms kaida laika tei beja Rībeņu nūvoda teritorija), un nu Viļānim leidz Gaļānim ir tikai 12 kilometri.
TE BYUTU VĒĻ VĪNA LATGOLAS PĒRLE
Cik daudz mes zynom myusu Latgolas vēsturi? Cik daudz asam apmeklējuši Latgolas kulturvēsturiskōs vītas? Lai gyutu jaunus īspaidus, vysbīžōk braucam kaut kur uz tōlom zemem, uz ōrzemem. Jā, tys ari ir vērteigi – uzzynōt cytu tautu kulturu, redzēt pasauļa breinumus. Tys dūd kaidu jaunu impulsu un jaunas idejas. Bet ari myusu pošu zemeite ir skaista un ar bogōteigu vēsturi.
Komentāri