Majā Latvijas Nacionalū karaveiru bīdreiba un bīdreibas “Reāls piedzīvojums” Lobūs Dorbu komanda īstōdeja ōbeleites pi pansionata (socialōs apryupes centra “Ludza”) un pi skūlom – Mērdzines pamatskūlas un Ludzas vydusskūlas apkaimē. Praktiski atjaunōja ōbeļdōrzu Ludzas parkā. Un, kai vysod, strōdōja un prīcōjōs visi – ari skūlāni un vacī ļaudis. Pasōkumu vadeja Sandijs Krastiņš, par pasōkuma muzikalū gaisūtni pasaryupējōs Latvijas Nacionalū karaveiru bīdreibas pasōkumu organizatore Valērija Adža. Skaisti dzīdōja un muzicēja Ainārs Ašaks. Latvijas Nacionalū karaveiru bīdreibas ansamblis “Tēvija” skandēja latvīšu karaveiru dzīsmes. Pateikams jaunums beja rūbežsorgu klōtbyutne, jo jī na tikai strōdōja, bet ari gōja rūtaļōs kūpā ar skūlānim. Rūbežsorgu klōtbyutne īpaši pateikama beja Sandijam Krastiņam, kurs kai kapteinis ir dīnējis Latvijas armijā. Dīnas golā ari loba “olga” – ekskursija pa Ludzas skaistōm vītom, Ludzas muzeja (spēceigs senōtnes artefaktu ziņā) apmeklējums un interesants muzeja ekspozicijas un izstōžu zāļu kuratora Valērija Dzevaltovska stōstejums. Tolku atbaļsteja “Lāču maize”, kafejneica “Sēnīte”. Ari stōdaudzātovas “Bētras” (Jelgovas nūvoda Ozolnieku pogosts) uzjēmēja Iveta Grosa, kura čakli strōdōja visim leidza. Jei Lobajim Dorbim pīcu dorba godu laikā zīdōjuse gondreiž 1500 ōbeleišu un cytu augļu kūku stōdus. Nōkamais Lobūs Dorbu maršruts ir Kūrzeme, koncerti Skrundā. Un tei byus 50-tō vīta Latvijā, kur lelus un mozus, jaunus un na tik jaunus byus īprīcynōjuse Lobūs Dorbu komanda.
Jūlijs TRŌPS
Komentāri