Rudiņs, kai zynoms, ir na tikai kartupeļu, guļbu, buļbu, tupeņu – kai nu kurā vītā sauc myusu ūtrū maizi – laseišonas laiks, bet ari dzejas laiks, kod autori nu sovas gora lōdes valk laukā dzejūli pēc dzejūļa.
13. septembrī Rogovkas Kulturas centrā nūtyka dzejas slams “Rogovkys dzejis voga”, kas jau catūrtū rudini pēc kōrtas sapulcynoj latgaliski rokstūšūs literatus.
Šūreiz dzejas vogā sasacentēs 10 daleibnīki: Elizabete, Elīza Marija, Linards Kalniņš, Benedikta Mežale, Aija Mikele, Evika Muizniece, Valija Platace, Annele Slišāne, Laura Strode un Dace Tihovska. Vokors beja spraigs – dzejnīki trejs sacenseibu kōrtōs ceinējōs par uzvaru, un uzvarātōju nūteice žurijas un skateitōju bolsōjums. Šūreiz žurijā beja Latgalīšu volūdas, literaturas un kultūrvēstures skūlōtōju asociacijas vadeitōja, skūlōtōja Veronika Dundure, latgalīšu ziņu portala
lakuga.lv
vadeitōja Amanda Anusāne, literate, literaturzynōtneica Ilze Sperga, pārnejō goda “Rogovkys dzejis vogas” uzvarātōjs Silvestrs un šō goda Latvijas nacionalō dzejas slama čempionata uzvarātōja Grēta Volkoviča. Šūgod par “Rogovkys dzejis vogas” uzvarātōju kliva
Valija Platace
. Jei sajēme golvonū bolvu – naudas bolvu nu Nautrānu pogosta un latgalīšu kulturas kusteibas “Volūda”, kai ari dzejūļu kūpas publikaciju portalā
lakuga.lv
un īspēju 2026. godā izmontōt desmit dīnu garu rezidenci Lūznavas muižā, kurā nūdrūšynōta dzeivōšona un radūšō stipendija jaunu dorbu tapšonai, kai ari īspēja pīsadaleitīs Latvijas Nacio-nalajā dzejas slama čempionatā 2026. godā. Ari pōrejī slama daleibnīki sajēme vērteigas dōvonas! Dzejas autoru uzastōšonūs papyldynōja grupas “Sovvaļnīks” un Rēzeknes nūvoda vokalōs studijas “Skonai” pyrmatskaņōjumi ar pārnejō goda slama uzvarātōja Silvestra dzeju. Taipat muzikali vysus prīcēja ari grupas “TKP/tā kā pērn” uzastōšonōs. Dzejas slamu “Rogovkys dzejis voga” finansiali atbaļsteja Vaļsts kulturkapitala fonds sadarbeibā ar latgalīšu kulturas kusteibu “Volūda”. Dzeja, muzika un pozitivas emocijas pīpiļdeja kotra sirdi. Paļdis reikōtōjim par sirsneigū pasōkumu!
Aija MIKELE-STRUŠELE
Komentāri