Vasala, Maseit! Šūreiz, kod satyku Donetu, maņ jys soka: “Es tev grybu atgōdynōt, kū aizmērsti pīraksteit, koč na reizi asu tev sacejis.
Sovā laikā Eiropas Savīneiba kai “miļzi” uz mōla kōjom pastateja — tū jaunū naudu, eiru, īvede. Lelu dorbu padareja. Prāca to lela, a tolks? Naudu nūstabilizēja kai dzeda garča škoļnīki. Moš dēļ tō, lai lobōk varātu nu vaļstu naudas maisim pa caurumim naudu pagrōbōt. Tai saceit, lykumeigi.
Cik jimt? Cik gribi! Koč vysu maisu rozdeiroj, iztukšoj, izkosi, atmozgoj. Bet pēčōk, kai soka, “pēc maņa koč plyudi”. Kai nibejs. Moš nōkušīs tū putru izstrēbs.
A te sagōja sovaižōk. Kod oļpim sōcēs krizes Eiropas vaļstīs, tod atsajēdze. Labi, ka koč nadaudz jēdzeigōku lāmumu pījēme. Niule vaļsts budžeta maisam caurums dreikst byut, bet naļels, lai tikai pa drupeitei var pasagrōbsteit. Pretejā gadejumā nu Eiropas Savīneibas dabōšūt pa “myzu”.
A pagōjušō goda beigōs radejā dzēržu: Eiropai napateik, ka Latvejas naudas maiss jau ilgi nav bejs bez cauruma. Nu a kū poši īprīkš pījēme? Te nu ir tam mītam ūtrais gols.”
Kū te vēļ lai soka. Demokrateja. Tys ir vīns lels trikmīņs naudas un varas lītōs vysaugstōkajūs ešalonūs.
Pļōpu Pīters
Komentāri