“Vasali, muni dōrgī tautīši Latgolā! Beju pateikami pōrsteigts “Rēzeknes Vēstīs” 28. janvara numurā atrast osprōteigōs Plōciņu Maseites ziņōjumu kūpā ar padūmu: “I par casnāgim naaizmērstit!”. Ilgōku laiku nikas nabeja dzēržams nu Plōciņu Maseites. Dūmovu, ka ir aizbraukuse uz Kaliporneju pasasiļdeit. Paļdis Dīvam, ka Maseite naasūt nikur “propuluse”, i otkon labi beja pasmaideit kūpā ar vysom Janeitem, Faneitem, Anceitem i Jugaseitem. Lobu veseleibu, prīku, laimi i veiksmi Jyusim vysim, brōli latgalīši un mōsas latgalītes, Jaunajā godā! Gaidom jaunas ziņas nu Rāznes. Kanadas Viļuks” Taidu depešu Zoses internētajā kastē napaseņ nu Canadas atlaide cīnejamais labdars un namīra gors Viļuks Mileiko.
Myužeigs skaistums! Kab jyus, dōrgiņkī, zynōjušs, kaidu glaunu grōmotu par sovu dzymtū pusi myusu Viļuks naseņ izdeve kūpā ar Eļkšņu Jōni! Maņ Zose parōdeja. Tōs nūsaukums — “Andrupenes baznīca, draudze un tās kalpi”, sarakstejuse Inga Sivicka, rūku dalicis bejušais draudzes prāvests M. Sivickis un pats dr. Vilis Mileiko, kurš sovas bērneibas atmiņu stōsteņā roksta: “Ko nesīs nākotne, to mēs nezinām neviens, bet mēs zinām, ka viss labais nāk no Dieva žēlastības, no Viņa labvēlības, tāpēc lūgsim, lai viņš saved draudzē daudz cilvēku, kas meklē Dievu. Gala vārds pieder Debesu Tēvam, un, ja Viņš tā gribēs, tad pastāvēs Andrupene un pastāvēs arī tās draudze. Un to es Andrupenei no sirds novēlu!”
Nu cīši glauna grōmota, cītim, glanceitim vōkim, ar biļdem pīlykumā; ar stōstenim par bazneicu, draudzi, bazneickungim, kuri strōdōjuši Andrupenē. Un cik breineigi nūslāguma vōrdi!
Paļdis i paļdis grōmotas patronam i sponsoram Viļam Mileiko nu Kanadas!
Lai jam loba veseleiba un lai Dīvs dūd spāku vēļ daudz lobu dorbu Tāvzemei veļteit!
Plōciņu Mase
2016. goda 11. februarī
Rāznē
Komentāri