Pyrms 90 godim, 1926. goda martā, pi laseitōjim sovu ceļu uzsōka religiski sabīdriskais mēnešroksts “Katōļu Dzeive”. Tū var uzskateit par vīnu nu vacōkīm Latvijas religiskajim izdavumim katōļticeigīm, kura golvonais mērkis beja sludynōt Dīva vōrdu ar raksteitō vōrda paleidzeibu. Tōlajā 1926. godā žurnals iznōce Reigas Goreigō seminara profesora Dominika Jaudzema redakcijā, bet īspīsts tyka Rēzeknē, tipografijā “Dorbs un zineiba”. D. Jaudzema laikā žurnala saturu veidōja roksti par religijas un morales jautōjumim, tyka analizētas dažaidas sova laika sadzeives parōdeibas nu katōliskō redzes vīdūkļa. Nu 1929. leidz 1940. godam par redaktoru strōdōja Goreigō seminara profesors Aleksandrs Novickis, bet izdavuma īspīsšona tyka pōrcalta uz Reigu. Žurnals iznōce regulari kotru mēnesi, sōkumā kotrā numurā beja 32 lopaspuses, bet ar laiku tūs skaits pasalelynōja leidz 40, pyrmō un pādējō lopaspuse beja atvēlēta kaidai ilustracijai. A. Novickis daudz strōdōja pi žurnala satura atsvaidzynōšonas un dažaidōšonas. Kai jaunums pasarōdeja attīceigūs mēnešu Bazneicas kalendars, ziņas nu dzimtines un ōrzemem, ari sludynōjumi. Nu 1932. goda kotrā numurā beja “Styureits bārnim”, “Ziņu vōceleite”, “Puslopa atpyutai”. Žurnalā tyka publicēti dažaidi padūmi, atbiļdes uz laseitōju jautōjumim. Redaktors ceņtēs pēc īspējas vairōk raksteit par katōļu aktivitatem Latvijā, publicēt vēstures materialus par Latvijas katōļu draudzem. Bīži žurnalam sovus rokstus syuteja veiskups J. Rancāns, veiskups B. Sloskāns, L. Latkovskis, Naaizmērstule vadeja žurnala bārnu nūdaļu. Leidz 1940. godam žurnals iznōce tikai latgaliski un sasnēdze īvārojamu tiražu — 11 tyukstūšus eksemplaru. Šaidu tiražu leidz šam nabeja pīdzeivōjis nivīns latgalīšu izdavums. Žurnals beja vīns nu ratajim, kurš iztyka bez pabolsta nu molas un spēja pats sevi apmoksōt. “Katōļu Dzeive” beja popularōkais un vysvairōk laseitais žurnals Latgolā. Cylvāki gaideja kotru jaunū numuru ari cytvīt Latvijā, tys tyka syuteits uz ōrzemem un kolpōja par saikni ar tautīšim plašajā pasaulē. 1940. godā padūmu vaļdeiba žurnala izdūšonu aizlīdze. Tikai 1988. godā pēc naskaitamim lyugumim žurnala darbeiba tyka atjaunōta. Tū atsōka izdūt Reigas Metropolijas kūrija, redakcija atsaroda Viļānūs, par izdavuma golvonū redaktoru daudzus godus strōdōja prīsters A. Aglonietis, vālōk — mariaņu tāvs A. Ševels. Nanūvērtējams ir redaktores, žurnalistes, diplomētas filologes Marutas Latkovskas ilggadejais īguļdējums. Pēc atjaunōšonas, par pamatu paturūt kristeigōs vērteibas, “Katōļu Dzeive” sovōs lopaspusēs daudz vītas veļteja Latgolas kulturai. Žurnalā publicēja prīsteru J. Pujata, A. Aglonīša, A. Budžes; J. Klīdzēja, Z. Mauriņas, L. Leikumas, V. Valeiņa, P. Zeiles, A. Kūkoja, V. Lukaševiča, M. Andžānes un daudzu cytu Latvijā pazeistamu goreidznīku, sabīdrisku darbinīku un literatu dorbus. Godu gaitā “Katōļu Dzeive” beja izkūpuse skaistu un bogōtu latgalīšu volūdu, tamā regulari tyka publicēti literari dorbi latgaliski. 2014. goda nūgalē, apzynojūt finansialōs īspējas, tyka pījemts lāmums pōrtraukt žurnala izdūšonu. M. Latkovska kaidā intervijā atzyna: “Sōkumā žurnalam beja 50 000 lela tiraža, tagad vīn nadaudz vairōk par tuykstūti. Nu tōs paaudzes, kas laseja šū izdavumu, daudzi jau myužeibā, bet jaunajai paaudzei acimradzūt ir cytas intereses.” Tai kai žurnalā blokus nopītnim religiska satura rokstim beja bogōteigs dažaidu ziņu daudzums, “Katōļu Dzeivi” var uzskateit par vērteigu kulturvēsturisku materialu, kura nūzeime ar godim kļius tikai lelōka. Rēzeknes Centralōs bibliotekas laseitovā ir pīejami visi nu 1989. leidz 2014. godam iznōkušī žurnala numuri. Ar tīm laseitovas apmeklātōji var īpazeitīs gon uz vītas, gon jemt laseišonai uz mōjom. Nu 16. februara laseitovā apskotama “Katōļu Dzeivei” veļteita izstōde.
Anita GAIDULE,
RCB laseitovas vadeitōja
Attālā: “Katōļu Dzeives” pādejais numurs. Uz 1. vōka — Klāra un Ontons Ceļapīteri ar unukim.
Komentāri