Vasala, Plōciņu Maseit!
Itamā reizē Pļapatunu Donets īsōce runōt itai: “Pīter! Jaunajai, tys ir vacajai, vaļdeibai 100 dīnu. Tai kai itū vaļdeibu pōrstōv tōs pošas partejas, un jymā strōdoj daļa nu vacīm ministrim, tod tī ir vacī vēži cytā kulē. Vyss nūteik, tikai ar cytu vadeitōju prīkšgolā. Tai ka vaļdeiba vacō, un tei valkās tōļōk jau vairōkus godus un vysmoz divejas saimes.
Ar ōrsteišonas dzjabri jī tok sūlōs tikt golā. Nu pagaideisim tū juli. Kas byus sovaižōk? Dzjabri sōks pa druskai aizbērt ci nā?
Eisi sokūt, nu vīnas dūbes — ūtrā. Cikom bužeta maisu lōpeja, i tai vēļ nasalōpeja, jau ōrstnīceiba pavysam sasaškībe. Voi ta īprīkšejūs vaļdeibu vadeitōji namanēja itū kāsti? Deļ kam dalaide leidz taidom garom ryndom? Pošim vyss nūteik par naudu, deļ to ceļ sev olgas, un uz tīm ryndā stōvētōjim nūsaspļaut.
Vīneigō škode un lyga ir tei, ka tyvojās vēlēšonas, un jōs, tai lykumeigi zūgūt un naudu mozgojūt, var podīt ni maneitas, ni gaideitas. Tai, nateirūs dorbus dorūt, var aizmērst par teirīm. Kaidus padareitūs tod liks bolsōtōjim prīškā?
Vēļ par tom ryndom, par kū teļevizors runōja nedeļas sōkumā. Bārnim zūbu ōrstēšona jōgaida septeni mēneši! Itys ir taids sposobs, kai lobōk gōdōt par jaunū paaudzi. Īgaumejit! Dorit vysu, lai navajadzātu īt pi ōrsta. Sātā poši sev zūbus ōrstejit. Redzēsit — ryndas pagaiss momentā. Gryutōk byus ar protezēšonu, kod seši, septeni godi jōgaida. Tys skar vacūs cylvākus. Kai jī tū sātā veiks, pat es dasadūmōtīs navaru.”
Pļōpu Pīters
PLŌCIŅU MASES KOMENTS.
Myužeigs skaistums! Kū jyus, puiši, tī — par zūbim. Vaļdeibeņā tak gudreibas beņči! Nu, pazar, dēļ kam bārnukim ōrstēt pīna zūbus, ka tī taipoš pēc laika izbērs. I dēļ kam večim groba naudeņu par protezim izsvīst: vacī i bez zūbu putru voi buļbu styumīni var īškā stumt. Kai ta myusu babas i dzedi ēde, kod protezi vēļ nabeja izgudrōti? Zūbi — ite pusbāda. Viņ ka lelōka kvoroba dasamatās, tod jau tei gaideišonas rynda vad iz nikurīni..
Komentāri