Breinumu Dareitōja Jaunova Marija i Aglyuna Agneses sātā tyka pīmynātas bīži. Babeņa stōsteja, ka tī vītu bazneicai asūt izraudzejuse Dīva Mōte. Jau senejūs laikus jei tur beja īsaroduse un egles kūkā sovu attālu pamatuse. Kristeigi ļauds tū asūt atraduši i nūsprīduši tamā vītā ceļt bazneicu. Tai vālōk ari izdareits. Par Jaunovas Marijas žāļsirdeibu runōja vysi i gryutūs breižūs nu sirds lyudze Jōs paleidzeibu. Agneses mōte ilgi mūcejōs ar bryucem iz kōjas, jau godu godim tōs strutōja un nadzeja. Ļauds runōja, ka tei asūt “caurō rūze” un ka tū izdzīdynōt naasūt varams. Mōte beja braukuse gon pi ōrstu, gon aizrunōtōju, bet ni zōles, ni “styprī vōrdi” naleidzēja. Tod mōte izlēme dūtīs iz Aglyunu un lyugt paleidzeibu nu Dīva Mōtes. Tei beja jōs pādejō un vyslelōkō cereiba voi, kai babeņa saceja, nūceja. Dīnu īprīkš agri nu reita izgōjuse, ap nešpora laiku jei jau beja Aglyunā. Vysu ceļu jei lyudzēs, turpynōja tū dareit ari nakti un nōkušū dīnu. Ar taidu sōpeigu kōju ejūt, garais ceļš nabeja nu vīglajim, bet ticeiba un styngrō apsajimšona tū paleidzēja īveikt. Mōte gōjuse ari pi svātō olūteņa un bryuces mozgōjuse ar tō iudini. Svieteitū iudini jei pajāmuse leidza ari iz sātu. Piec Sv. Mises mōte davusēs atpakaļceļā. Ni eisti āduse, ni guliejuse, jei vysu vokoru un lelōkū nakts daļu gōjuse. Ari sātā nabeiguse lyugtīs un ar svieteitū iudini bryuces mozgōt. Pēc pavysam nagara laika nūtyka it kai naīspējamais — bryuces sōce dzeit i vaira naatsataiseja. Kas tys beja — dūmas spāks voi Dīva Mōtes paleidzeiba, bet mōmuleņa pēc itō Aglyunas gōjīņa jutos spiergta i prīceiga tecēja sovūs naskaitamajūs dorbūs.
Veronika TENČA-GOLDMANE
(Nu gr. “Pastareite”, izd. 1999. g., Viļānūs). J. GAILUMA zīm.
Komentāri