Vasala, Plōciņu Maseit!
Donets šūreiz otkon sōce par bužetu: “Tys ir kai dzjabrains ceļš. Kur pagrōb naudeņu, tī rūnās jauna dzjabre. Taidam ceļam nikod asfaļta naliks.
Tai tys ir ar vysom klopotom. Par tū, ka narysynōja. Pamete pēčam. Ļauds cerēja, ka lobōk byus jau pēc pīcim godim, bet te tū lobumu jau divdesmit pīcus godus gaidom. Varēja mudri tikt golā, pīmāram, ar aizbraucēju klopotu. Kū tu! Lobōk lai laiks sovā Saimē itūs lāmumus pījem. Nu laiks ir taisneigs. Pījem itūs lykumus, bez kļyudom. Myusu jau ir mozōk kai diveji miļjoni.
Progresa nūdūklis. Saimes skatejumā taisneigs ir taids, kod moksoj vysi vīnaidai. I bogōtī, i nabogī.
Kai tys var byut pareizi? Bogōtīm tys ir pilīņs jyurā. Un kaida prīca! Nu kai tu Saimes pūgas spaideisi par švaku sovim labdarim bagaturim. Tod jī var nazīdōt, tys ir, nanūpērkt parteju par naudu pyrms vēlēšonom. Kai tod brauksi pi bolsōtōjim, lai acis aizmāleitu, lai zūbus aizrunōtu, lai bolsōt pīrunōtu voi kai sovaižōk apmōneitu? Tūs tryuceigūs, nabadzeņus, bobuleišus. Jī tikai dēļ nūbolsōšonas der. ”
Nu kū. Mes deram tikai dēļ nūbolsōšonas. Un ja nu pīnōks taida strāče, ka nikas vairs naleidzēs, jimsim un nūbolsōsim pret vysvairōk nūpērktū parteju? Tod to byus myužeigs skaistums.
Pļōpu Pīters
Komentāri