Vasala, Plōciņu Maseit!
Itū reizi Pļapatunu Donetam beja kū saceit. Kai sōce, ni apturēt: “Ļauteni, ļustejitēs. Pasauļa breinums. Itū jōīroksta vaļsts vēstures grōmotā un skūlōs jōvuica. Beidzūt vīns dorbs drusku dadareits: vīna taisneiba — vīns lykums tim, kuri sajem naudeņu nu vaļsts! Sajimtū indeksēs!” Puišam prīcas beja pylnas yuzas.
Kod pēc strāčes jū satyku, beja pavysam sašļōps: veļti asūt vaļdeibu slavējs. Otkon pigu parōdējuse.
Tagad jam cyta runa par politiku. “Igauņi naglōb sovejūs uzjāmumus tai, kai myusejī. Laikam cīši bogōta vaļsts, koč i ar cauru budžeta maisu.
Myusejī cikom “Līpōjas metelurgu” glōbe, sagōja vīni zaudējumi. Zini, kū gudreibas beņči tī panōce? Likvidators sajēme olgā vairōk kai miļjinu eiro. Teļevizers parōdeja, kai vīns deputats nu tribinas tū soka. A kū tī citi saimes zalā? Kecinej i zūbus rōda. Redzj, cik nūpītni jī strōdoj.
Kotrā budžetā nu naudas naparadzātim gadejumim teik paradzāts vīns gadejums. Pēc jaunōkajom ziņom, trejs miļjini nōkušgod tiks rozdaleiti deputatim. Tys dūmōts, lai ļaudis varātu sovim deputatim izsaceit, kō jim vysuvairōk tryukst.
Tu, Pīter, uzroksti “Vēstim” munu aicynōjumu: Meilī ļauteni, nabyusim glupi. Ar praseibom apbērsim deputatus. Lai tōs vysas praseibas izpiļdeitu, jī byus spīsti likvidēt ministrejas, komisejas, moš i prezidenta omotu. Paliks tikai saime, kas piļdeis tautas grybu pa taisnū. Pēc myusu pīprasejuma.”
Eh, labi jau byutu, ka deputateni tū grybātu.
Pļōpu Pīters
Komentāri