Vasala, Plōciņu Maseit! Nadūd pādejā laikā maņ mīra tys myusu vaļsteņas pusmiļjons. Ņā, ņā, Maseit, es na par naudu, kū tī augšā ar šuplem rauš. Es par pusmiļjonu myusu ļauteņu, kuri komojās, gorūzeņas grauzdami.
Viņdīn Pļapatunu Donetam vaicōju: “Kū dareit itai lelajai nabogu armejai? Kai cilvēcenim dzeivōt?”
Jys maņ atbiļd: “Kaidai armejai? Armejai jī nikai naderēs: cikom veseleibu pōrbaudeis, cikom atbarōs, cikom apgērbs, cikom apaus..
Zini, cik naudeņas byus palaists vējā!
Par apovim runojūt. Pīmini atmūdas saukli “Koč veizēs, bet breivā Latvijā!”. Nu redzj, te jau tei “obuve” nūsaukta. Veizes! Tai kai tyvojās 100 godu jubilejs, tod byutu jōstaigoj taidōs prostōkōs drēbēs, kai pyrms 100 godu. Īteicams ar īlōpim. Lynu lyndrakūs, lynu yuzōs. Viņ ar tōm veizem problema. Kur tu jōs dabōsi? Dancori, edzj kur, Dzīsmu svātkim par dōrgu naudu pērk. Nu tod bez veizem, moš kumpolu šļopkōs jōīt iz tīm jubileja trikmīnim. Īteicams grūzeitīs, kur byus prezidents, ministreju pōrstōvi, deputati un citi kungi.
Nūteikti jōsapuļcej tī, kur var tyvōk tikt pi vaļsts pōrstōvu i telekameru. Jōnūgaida, kod jūs intervēs voi kod keids runu saceis. Tod izdeveigā strāčē jōpavaicoj: “Kur tōs veizes breivā Latvijā palykušas?” Lobōk īsabļaut tai, lai izskaņ pa vysu vaļsti. I tod, ka teļevizerī parōdeis, tauta redzēs, kurs tys eistynais patriots, kuram tōs veizes kōjōs pa šai dīnai.
Es tev pastōteju, kai svātki jōsviņ. Bet kai jōdzeivoj, zini? Kod gaideis ōrzemu delegaceju, pi Saimes durovom byutu jōatvalk koč vīns atkrytumu konteners un tymā jōsōk ēdīni meklēt. Jōparōda pasaulei, kai mes dzeivojam, cik mes olkoni asam. Tys ir nabogu golvonais uzdavums.
Varbyut tod Saime sōks dūmōt par nabogim, kuru pi myusu vairōk nakai pusmiļjona,” sovu runu pabeidze Donets.
“Doņc, tu galeigi aizasepinēji. Kas tev ļaus māslu kontenerus da Saimes noma iz vacū Reigu stīpt? Sagius poliči i iz cjurki.
Bet ar tū Saimi tai asūt. Kurs tī īškā teik, kai apčaravōts palīk: vysu caur ružovim okulerim sōk redzēt un vēļ daboj pi ocu klapes kai zyrgim, lai nasavērt ni pa labi, ni pa kreisi i naredzēt, kai ļauteni, kas par jim bolsōja, komojās,” tai es, Maseit, pasacēju Donetam. Lai nasagudrej.
Es to dūmoju, ka nabadzeņu uzdavums ir pavysam cyts. Padūmoj tik, ka itys pusmiļjons pyrms vēlēšonu sasastutētu kūpā i izītu ar sovim skručeišim, ratenim, staiguleišim īlōs voi Saimes nomu apstōtu cīšā virtinē. Dūmoju, ka nu pusmiļjona na vīna viņ kōrta taida dzeiva “striča” saītu.
Kas tod byutu? Kungim — bikses pylnas.
Palīc vasala, Maseit!
Pļōpu Pīters
Komentāri