Kod tagad sasatykom ar Pļapatunu Donetu, tod pynom tōļōk tū alkagola pynāklu.
Es jam vaicōju: “Kas līdz pījimt taidu lykumu, lai sātā alkagolu naražōtu?”
Donets atbiļdēja: “Kū tu! Samagonu dzyna i dzeis. Kas nūtyka pyrms 15 voi 20 godim, tu vēļ pats labi pīmini. Radive uzdeve vīnam deputatam taišņi itū pošu vaicōjumu. Jys atbiļdēja: “ Tod sātā navarēs veinu taiseit.” Beja pat jōnūbolsoj par dzeršonas sōkšonu tikai nu 60 godu.
Tys vīņ kū vērts, ka pītyka pīcu parokstu, lai par taidu vaicōjumu varātu nūbolsōt. Kas izgōja? Tikai 18 deputati nūbolsova par aizlīgumu. Jī pat dorbā na reizi bejuši īžvyngōjuši. Sazyn kū dzāruši. Labi, ka braņdini. Var tok i kaidu krutkeni pošu lykumeigi atļautajā točkā nūpērkt. Moš pa tū vydu kaids nu pošim taisa itū biznesi.
Naz, voi Saimē vysi kulturaly dzārōji. Pi lela okōta vīns ūtrs šņabōtōjs jau var gatavōtīs laiceigi kandidēt. Ka tik pi buteles labi raisōs mēle, kū vēļ vairōk vajag. Dzert, klauseitīs ziņas un pēčōk gveļzt. Tod byus labi. Uzspryšynoj drusku sevi, īrauņ ceļakōju un laidīs uz svešu vītu, kur tevi napazeist. Tikai turīs atstotu nu ļaužu. Lai nasaūž. Saūss i zynōs, kas par putynu.
A kod tiksi iz tribinas, sōc sūleit zalta kolnus. Viņ pōrlīcynūši vajag gveļzt: kai tūs zalta kolnus dabōsi; nu kurīnes atvessi. Labi gveļzsi, tiksi īvālāts. Byus naudeņa lobu lobū montu dzert, pyrmū dīnu, ūtrū dīnu, trešū, catūrtū.. Tai sokūt, apmozgōt. Īmeslis tak nūpītns: par deputatu asmu ticis. Tikai navajag pōrōk aizaraut. Var izlidynōt ōrā, kod sōksi bīži āmūņam gveļzt. Bet gveļzšonai lels spāks: bez tōs ni partejā tevi jims, ni Saimē vēlēs.”
Pļōpu Pīters
Komentāri