Vasala, Plōciņu Maseit!
Pļapatunu Donetam beja kū saceit. Maņ pat vaicōt navajadzēja. Jys sōce pats: “Redzēju autobusa aizmugurē reklamā vōrdu “muols”. Burtōju, burtōju, gudrōju, gudrōju, cik lels duraks beju, tik palyku. Nasaprotu, voi tī runa ir par latgaliskū “mōlu”, latviskū “mūli” voi “molu”, kur kugi pīstōj.’’
Tōļōk Donets runōja par Latgolas symtgades kungresu, taipat kai es nasapratis, nu kurīnes rauta Latgolas symtgade, ka latgaļu ciļts te jau pyrms divim tyukstūšim godu te dzeivōjuse.
“Nadaudz redzēju televizerī, bet labi, ka nadaudz,” jys saceja. “Prezidents beja, vaļdeibas ministri i premjers beja, Saimes spīkerīne beja.Tikai nasaprotu, kas beja delegati. Laikam tikai organizatori ar sovim svatim i bratim, kuri ar sovu “uo” un poštmūdeigū volūdu platejōs. Myusu pogostā, da i nivīnā cytā tak nikaidas sapuļces nabeja, i delegatus nivīns nasyuteja kai Trasuna laikā.
Tī pat izskanēja, ka kungress ir nalykumeigs. Bet organizatorim — vīns peips, ka tikai trikmīņs, par kungresu nūsaukts, i nūticis.”
Donetam vaicōju, kū dareit?
Atbiļde nabeja glupa: “Pīteik sātā, kukņē i nu tribinom muti dzesēt. Jōsōc vōkt vysas Latgolas voi pat Latvijas tautas parokstus par referenduma reikōšonu. Cylvāki ir pret taidom krūplom rokstu volūdas pōrmaiņom. Ar vīnu ignorēšonu, sok, ni muna cyuka, ni muna dryva, te napīteik. Cylvākim jōnūbolsoj, un tys smuts kai nabejs izgaiss. Tiks pīlykts punkts itam serialam vīnā spļōvīnī.
Viņ lela škode, ka itī čangali myusim, latgalīšim, pa vysu parapeju, leidz pat Amerikai, kaunu padarēja.”
Pļōpu Pīters
Komentāri