Apsūlēju, ar cereibu atrast materialus par
REGINU
HAHELI
(07.08.1927. — 17.12.1995.), Nūpalnim bogōtū kulturas darbineicu, Rēzeknes Gūda pilsūni internetresursūs. Dīmžāl vīn “Latgolas datūs”, kas tūp Daugavpilī, dažas skūpas ryndas vēsteja, ka Regina Hahele bejuse politike, strōdōjuse LKP Rēzeknes komitejā, Rēzeknes Gūda pilsūne, dzymuse 1927.07.08., myruse 1995. goda 16. (?) decembrī, apglobōta Rēzeknes katōļu kopūs. Un vyss. Ni vōrda vairōk par sirdsgudrū, Nūpalnim bogōtū kulturas darbineicu “nu slavonōs Rancānu dzymtas, kura vysūs laikūs beja un palyka latgalīte, cylvāks, kurs bez skalim vōrdim, vīneigi gūdprōteigi dorbu dorūt, aizstōvēja dzymtō nūvoda intereses, volūdu, tradīcijas. Voi myusu keramika byutu īmontōjuse pasaules slavu, ja, tai atdzymstūt, nu skorbajim tō laika ideologiskajim vējim, tū nabyutu pasorgōjuse Regina un jōs laikabīdri…. Kai Latgolas kulturas lobais gors, aizstōve i sorgōtōja, Regina paleidzēja kotram, kuram vīn beja vajadzeigs jōs padūms, dzeives pīredze, volūdu zynōšonas, žurnalistes talants…”. (1995. godā “Rēzeknes Vēstīs” raksteja Rēzeknes inteligences pōrstōvi.) Maņ personeigi ar cīnejamū Reginas kuņdzi gadējōs kūpā byut na pōrōk bīži — svineigā pasōkumā voi pīmiņas vītā, kur beju aicynōta kaidu dzejūli nūdeklamēt. Taidā reizē nu Reginas isamōcēju pareizi pučeites pi pīminekļa nūlikt, ar zīdim pret sevi pagrīztus. Regina tū darēja eleganti. Par jubilari atgōdynoj Reginas Haheles grōmota “Rēzekne”, kas veļteita Rēzeknes 700 godu jubilejai.
Anita GRAUDIŅA
P. S. Kod pyrms pīcim godim aicynōju laseitōjus, laikabīdrus uzraksteit atmiņas, atsauceibas tikpat kai nabeja. Žāl. Dūmoju, ka Regina gūdprōteigi ir kolpōjuse Dīvam un sovai tautai un ir peļnējuse, lai par jū mes varam izlaseit vairōk nakai pīcas rindeņas “Latgolas datūs”.
A. G.
Komentāri