Vasala, Cecileit! Pļōpu Pīters, kai zini, tik par politiku i politiku. Obi ar Doņku. Cytas runas jim nav.
Es to par laiceigom lītom. Pazar, kai cenas ceļās pi myusu. Kai iz mīlem. Mozō pilīņu buteļceņa dēļ mōgas vainem, 25 grami, moksoj pōri divim jurikim. Ite divarpusi maizes kukuli saīt.
Paļdis Dīvam, satyku Zosi. Jei soka: “Brauc iz foļvorku, losi žyužaines! Voi ta napīmini, ka pi babeņas Sakstagolā iz plitas vysod beja žyužaines aplītas. Nu vysaidom kvorobom derēja.”
Aizjūžu iz foļvorku. A tī vysa apleicīne nūpļauta, kai nūlaizeita. Lai pogosts nanūštrōpej. Tod Puļgeņce mani ar Zosi aizrōve da azara. Klēpi žyužaiņu pīškinu. Bez iņdem. Pa ceļam vēļ i vējgrīškas, i zyrga skōbines. A palīnēs valerjankas — klōjīņs! Tik lōpstas nabeja, ar kū sakneites parakt.
Žyužaiņu, Ceceit, šūgod da besa. Kai nagudras, vysōs ceļa molōs, sātmaļūs, grōvūs, kryumūs, skverūs, nanūpļautūs teirumūs. Pogolmūs lein pa vysom “škērbom”.
Vīna gudra tautas doktorša Aņa Zosei sacejuse: ja kaida zōleite lein pogolmā un acīs, dreiž byus vajadzeiga! Nabrezgoj.”
Un še tev! Žyužaine zynōja, ka zōlem cena ceļās. A ļautenim i mōgas, i vādari, i kōss, i sukota, i ašņaspīdīni jōōrstej.
Muna mōga niule var iztikt bez aptekas zōlem.
Tova PLŌCIŅU Mase
P. S. Cikom žyužaines zīd, vēļ palaseišu, kod kaidā dzjaļonkā tikšu. Ka tik slapņums naapškodej. Moš iz tērgu aiznesšu.
P. M.
ZOSES BIĻDĒ: žyužaines Rāznes īlōs (laseit nadreikst: saiņdētas ar mašiņu gazim!).
Komentāri