Izlosūt P. Lōča rokstu “RV” 17. augusta 3. lpp., var vīglōk uzelpōt — speid gaismeņa tuneļa golā ari “Olūtam”, trimdas latgaļu rokstim prof. Pītera Stroda ortografijas skaidrā drukā Vladislava Lōča īmyužynōtā.
Apraksteitais pīminekļa maketu konkursa uzvarātōjs “Olūts” (autors Ivo Folkmanis) atbylst dziļi simboliski: dzeiveibas, tureibas, myužeibas idejai. Ari laika ritējums vēsturē sakreit ar pīminekļa un muzeja sātas pabeigšonu par gūdu vaļsts 100-gadei. Līkās, kaidi augstōki spāki gatavoj ceļu taisneibai.
Pīmārs: kaids gaišs cylvāks Preiļu pusē uzdōvynōja byuvēt napabeigtu baļķu mōju. Baļķus apstrōdōja (par samoksu) ceļtnīceibas specialists Tālis Sala ar sovu dorba brigadi. (T. Sala ir uzcēlis Lēdmanē bazneicu, muzeju Imantam Ziedonim u.c.) Tālis Sala pagūdynōja ar sovu klōtbyušonu Vladislava Lōča 105 godu jubileju Rēzeknē. Sovu sūlējumu veic kai gūdaveirs.
Jau Pītera Lōča pogolmā pasaceļ skaista ceļtne — Vladislava Lōča muzejs, kurā varēs izvītōt vysu trimdas latgaļu dyžgoru rokstus. Vīta klusa, mīreiga Rēzeknes upes īlūkā. Munuprōt, muzeja zaļajā pogolmā vīta pīminekļam “Olūts”. Te, pogolmā, navajag nikaidu dōrgu “paklōju”.
Pīminekļa “Olūts” ideja ir identiska: obas ar muzeju — vīns vasals!
Anna BABRE
Komentāri