Atļaunit atkōrtōti uzsaukt, papyldynojūt 10. augusta rokstu “Lai dzeivoj “Mōras Zeme””! Lai Gora spāks i veseleiba “Mōras Zemes” veidōtōjai Anitai, “RV” vadeitōjai Mārai Nizinskai, LKC izdevnīceibas vadeitōjam Jōņam Elksnim!
Žāļ, ka nabeja īspējams 5. augustā byut klōt, jō vīnlaikus Ogres nūvoda Suntažūs nūtyka pīktais myusu kuplōs dzymtas (skaitā 550) salidōjums. Uzjēme šūreiz vīsmīleigī saiminīki Ārmaņu gimine, Jōņs un Elita (Suntažu skūlas direktore). Ik salidōjums (pēc trejs godim) bogōtynojās ar tradicijom, dzymtas sakņu vēstures pētējumim jau septeņōs paaudzēs. Oficiali dzymtas simboli ir karūgs, lelais un mozais gērbūņs, dzymtas devīze. Skaņ dzīsmes latvīšu, latgaļu volūdā, taipat uzrunas — sajyuta it kai asam vīnā Livonijas vaļstī (tei sabruka 1558. — 1583. godu karā), vīnōti, nasaškalti vīnas ciļts brōli un mōsas.
Sprigoni septeitōs paaudzes bērneli kai krōsaini tauriņi lidynojās i atraisa smaidu sērmgaļvim vactāvim, boltōm vacvacmāmeņom: tī teik īpaši pagūdynōti. Vērtējums — šaidi dzymtas salidōjumi vairoj patriotismu: nacijas vīnōteiba sōcās ar gimiņu vīnōteibu.
Dūmojūt par lapeņu “Mōras Zeme”, pacēļu nu laikrokstu skapa īsītūs žurnalus “Mōras Zeme”, prīkštečus, vēļ Ontona Seiksta saryupātūs pyrmūs Atmūdas vēstnešus. Pyrmais Nr. 1989. goda 25. septembrī. Tī ir vērteiba, kas videjai un jaunōkajai paaudzei svešas. Pīmāram: “Mes — latgaļi asam bejuši un asam goreigi bogōti, un tei bogōteiba ir myusu spāks.”
1990. gada 2. marta “Mōras Zemes” īvodroksts jau sasauc ar vīnu ūtru cytaidi latvyski dūmojūšū šudiņ. Tōpēc rodōs ideja.
Pyrmō — “Mōras Zemes” lapeņu dubultōt un vysmoz vīnu reizi mēnesī izdūt; ūtrō — leidz Latvijas vaļsts 99. godadīnai sanōkt kūpā visim bejušīm nu 1989. goda un pošreizejīm “Mōras Zemes” ideju nesējim gon rokstūs, gon dvēselē. Lai vīn paziņoj “Rēzeknes Vēstis” laiku un vītu. Es tycu — sanōks, sabrauks. Mes, paļdis Dīvam, vēļ visi naasom salauzti. Par tū līcynōja 15. augustā Aglyunā V. E. veiskupa Jōņa Buļa svātku nūbeiguma uzruna.
Ari 1990. goda 2. marta “Mōras Zemes” 1. un 2. lpp. ir Ontona Seiksta aicynōjums “Es otkol soku: “Celīs, brōļ!”” Naaizmērsti nikod — “Mes poši — saiminīki sovā zemē!”.
Uz sasatikšonūs!
Anna BABRE,
dzeivē nasalauztō septeņkōrtējō vacvacmāmeņa
Komentāri