Šū pasōkumu emocionalōku īkrōsōja grupas “Boltī lōči” izpiļdeitōs dzīsmes. Kod atskaneja “Skaidrō volūda”, visi pīsacēle kōjōs. LKC izdevnīceibas vadeitōjs Jōņs Eļksnis, uzrunōdams klōtasūšūs, uzsvēre, ka izdevnīceiba ir vīnmār dorbōjusēs ar mozim leidzeklim. “Jau pats nūsaukums izdevnīceibai līk par pīnōkumu izdūt grōmotas, kas svareigas vysai Latgolai,” jys saceja. Pošā sōkumā izdevnīceiba uzskateja, ka svareigi izdūt grōmotas par Latgolas vēsturi, un šeit lelu īguļdējumu devis profesors Pīters Zeile. Sadarbeiba ir ari ar Daugavpiļs Universitati un Rēzeknes Augstskūlu. “Izdevnīceiba navar pastōvēt bez autorim, asam jim ļūti pateiceigi. 25 godu laikā izaveidōjīs autoru kolektivs, ar kurim pastōveigi sasadorbojam. Daudzi nu jim, nabyudami pēc izgleiteibas vēsturnīki, tūmār ir nūpītni vēsturnīki. Par nūžālu, nu pošim vēsturnīkim naradzam taidus dorbus,” saceja Jōņs Eļksnis. Izdevnīceibu jubilejas pasōkumā apsveikt beja atnōcis Rēzeknes dūmes prīkšsādātōjs Aleksandrs Bartaševičs, kurš pasnēdze Jōņam Eļkšņa kungam Gūda rokstu un dōvynōjumu 100 eiro apmārā. Šaida pateiceiba izdevnīceibai izteikta par izcylim sasnāgumim latgalīšu kulturas un valūdas saglobōšonā un atteisteibā, par Rēzeknes un vysas Latgolas tāla popularizēšonu. Prūtams, naizpalyka ari treju īvārōjamūs latgalīšu Osvalda Zvejsalnīka, Pītera Keiša un Marka Bruzguļa, cylvāku, kurim beja rodusēs ideja par izdevnīceibas dybynōšonu, klōtbyušona. Jī izdevnīceibas vadeitōjam vēlēja iztureibu turpmōkajūs godūs. Navar napīkrist “Rēzeknes Vēstu” redaktores Māras Nizinskas saceitajam: kod dzēržam vōrdu Latgolas Kulturas centra izdevnīceiba — dūmojam par Jōni Eļksni, bet, dzēržūt pīmynam Jōņa Eļkšņa vōrdu, — saprūtom LKC izdevnīceibu. Sveicēju pulkā beja daudz literatu, ari jauno literaturas almanaha “Olūts” autori. Jī saceja lelu paļdis izdevējam par īspēju publicētīs. Pučes sajēme ari izdevnīceibas redaktore Valentina Unda. “Strōdōsim čaklōk, raksteisim, lai Eļkšņa kungam byutu kū publicēt. Un lai sponsori jam pošam nav jōmeklej,” aicynōja dzejneica Līvija Liepdruviete. Vēlēsim LKC izdevnīceibai vēļ daudz grōmotu izdūt!
Aija ZUJA
Eduarda UTĀNA foto
Komentāri