Nu vasaliņka, muna dōrgiņkō! Apnyka tamā Puļgeņces skaipī Tev, Ceceit, sovu saveitūšū vaigudrēbi rōdeit. Cikom rūka vēļ tur, rokstu.
Koč i slapņa vosora beja, Puļgeņce myusus ar Zosi paspēja pa apleicīnes smukōm vītom izvyzynōt. Ar kū? Ar sovu limuzinu naktineicu krōsā. I Kolnasātā īvede, i Kantinīku piliskolnā uzstīpe, i Plykpūrmaļūs saules rītēšonu parōdēja, i ap Rāznu apruļavōja, i Dagdā īgrīze, kod nu Aglyunas braucem. Tī, myužeigs skaistums!
Kai ar katapuļtu nacik vacūs laikūs īsvīde. Apsaraudōju, kod vēsturiskus pīminekļus īraudzēju. Jauneibā atsagrīzem obas ar Zosi. I sōkom tūs laikus cylōt, kod nikaidu lelu klopotu nabeja, kod myusu vītā dūmōja, kod cylvāks cylvākam “draugs, bīdris un brōļs” beja.
Pazar — kinoteatris “Komjaunīts”, kai dzeivs, viņ tukšs. Namudž ļauteni kai seņōk.
A Zose izreiz par komjaunīm: “Pīmiņ, kai skūlā myusu klasi par komujaku klasi taiseja. Viņ Jugase i tu, Maseit, kai tormozs niparkū, da pādejō turējīs pretim. Koč vysaidus lobumus sūlēja..”
I kas nu tō sagōja? Myužeigs skaistums! Saceja, ka visi celi komjaunīm byus vaļā. Nazynu, kai tī citi celi, bet tys, pa kuru es da goroda nu foļvarceņas kotru dīnu pusstuņdi čōpōju voi ar lisapedu brauču, beja cīt, kod Rāznē dorbu meklēju. Nikur najēme. Par tū, ka beju nu seļsaveta. Dzeravnē auguse, dzeravnes klāvu i brīņ.
Par laimi, sābra vadakla Ļubeite paleidzēja, pa blatam Pīna konservu kombinata kaļtēšonas cekā pajēme mani seipulus laupeit. Osoras sōkūs byra, a pēčōk — nikō. Viņ rūkas smirdēja, mozgoj ci namozgoj. Myužeigs skaistums!
Kai rozapurpēja Zose. Dēļ kō tys “Komjaunīts” te stōv, jōjauc nūst. A tod vēļ īraudzēja saukli “Slava trudu!”, sīnā īmyurātu, aiz dusmem pazilēja. Nazynu, par kū jai “Slava dorbam” napatyka.
Paļdis Dīvam, ka Puļgeņce beja klōt. “Tei tak vēsture, mameņ. Lai stōv pīminekli, lai stōsta i rōda gidi. Dagdas ekskļuzivs!” jei saceja i vede myusus nazkodēju Dagdas gastiņču pabriku “Narūtu” rōdeit. Dā, tūlaik beja te vysaidi rīksteni šokoladā, jyuras akmisteni, gūtenis, ar kū gostus podčavōt. Myužeigs skaistums!
Niule ari vysa kō da besa. Ka tik jevriki byutu.
Plōciņu Mase
2017. goda 16. novembrī
Puļgeņces biļdes
Komentāri