Skrindu dzymtas muzejā, Daugavpiļs nūvoda Vabōlē 9. — 10. novembrī nūtyka Storptautiska zynōtniski praktiska konference “Latgolas pyrmōs atmūdas darbinīku davums Latgolas virzeibā uz Latvijas vaļstiskumu”. Konference nūtyka Latgolas kongresa un Latvijas symtgades programu ītvorūs, lai gūdynōtu myusu vaļsts dybynōtōjus un pīminētu nūtykumus, kas beja byutiski Latvijas vaļsts izveidē. Daugavpiļs nūvoda kulturvide globoj atmiņas par īpaši nūzeimeigom personeibom, kuru dūmom un dorbim beja izcyla nūzeime daudzūs nutykumūs, kas saisteiti ar vaļsts veidōšonu. Te krustōjušīs dzejnīka Raiņa, Latgolas apgaismōtōju brōļu Skrindu un kooperacijas darbinīka Viļa Siliņa dzeives celi. Pyrmī Latgolas tautas atmūdas darbinīki brōli Benedikts (1868 — 1947), Kazimirs (1875 — 1919) un Ontons (1881 — 1918) Skrindas dzymuši Leiksnas (tagad Vabōles) pogosta Līpas Mukānūs. Konferences programas zynōtniskūs temu plašais lūks deve īspēju izzynōt Latvijas vaļstiskuma veidōšonōs ceļus. Referenti, vēsturnīki, literaturzynōtnīki, kulturas darbinīki, ari goreidznīceibas pōrstōvi runōja par Latgolas kongresu un Franci Trasunu, par Raiņa goreigū montōjumu, par brōļu Skrindu lūmu tautas izgleitōšonā. Daugavpiļs Jezus Sirds draudzes vikara, DU doktoranta referata temats beja “Īskots Benedikta Skrindas (1868 — 1947) dzeives gōjumā: bez jō nabyutu brōļu Skrindu”. Sovukōrt par “Latgalīšu volūdas pīlītōjumu šudiņ” ziņōja NBS kapelans, majors Raimonds Krasinskis, kurš pasōkuma daleibnīkim beja atvedis nupat LKC izdevnīceibā izdūtōs grōmateņas, poša sastōdeitu, bogōteigi ilustrētu brošureņu par Skrindu dzymtu, par brōlim Skrindom, par Leiksnas pogostu “Brōļu Skrindu dzeive un darbeiba” un 1914. godā Rēzeknes izdevnīceibā “Dorbs un zineiba” izdūtōs dzejūļu grōmateņas “Kūkle” atkōrtōtu izdavumu; bez tam konferences daleibnīkim sagatavōjis dōvonas. Nūtyka ari Latgolas Kulturvēstures muzeja ceļōjūšōs izstōdes “Pōri slīkšņam” atklōšona Vabōles kulturas nomā.
Sagatavōja
Anita GRAUDIŅA
Foto — nu portala skrindumuzejs.lv
Komentāri