Vasaļiņka, Plōciņu Maseit! Jo jau avīzē var izlaseit, kū tu roksti iz Kaļiporņeju, to jau esi sprauna. Par tū myusim te cīši lela prīca.
Tai kai lelu šaļti maņ nasagōja raksteit, Pļapatunu Donets, saticis mani pi bazneicas, jēmēs srameit: “Kō naroksti? Ka naraksteisi, par myusim aizmērss pavysam! Kū ta tu taidu līkū dori, ka navari pīraksteit ni rindenis, ni tō, kū es tev soku? Atmet tū nadereigū! Roksti, cikom rokstōs.
Labi, Pīter! Nav kod te daudzi skaidrōtīs. Avīze na dēļ tō dūmōta! Tagad, kai sprauna myusa lidinej, es runōšu, a tu klausīs.
Tu pazar, kaidi tī myusu celi! Kai Europā tykuši, pavysam rozavuicejuši ceļus greiderēt. Vysu sagreiderej grōvūs. Komunistu laikūs iz ceļa vyda sastyume, tod ceļa vydu izleidzynova, bet tagad nūrauš grōvūs ceļa vērskōrtu, i teiri papeiri. Par kū tikai jim naudu moksoj? Suņs moža zyna.
Dzērdēji, ka vīna un diveju centu naudeņu izjimšūt nu apgrūzeibas. Lai tērdznīceibas biznesā vairōk miļjoneru byutu? Smejīs? Taišņi ūtraižōk. Vīna nulle nu aizmugures jōnūjem nūstyn. Mozōk tūs naudasmaisu paliks, visi drusku vīnaižōk dzeivōs un varēs par vīnu voi divejim centim kū nūpērkt.
Tā dūmōju, ka vēļ vīns symtgades trykmīņs byus, cerēju, ka beidzūt tauta varēs vēlēt prezidentu. Bet nikō. Ziņōs pasaceja, ka tikai deputati tū varēs nu nōkamō goda atklōtai dareit.
A niule par lelōkū vaļsts symtgodu jubileja zibiņs spērīni. Tys myužu myužūs īīs vēsturē, Pītereit. Kai pārkyuņs nu skaidrim dabasim — trykmīņs cylvāka tīseibōs. Vēļ nanūtīsōts cylvāks jau nūsaukts pasauļam dēļ mēļu kuļsteišonas. Myusu djakaneņš! Kai komteļora laikūs pa klusū augusta beigōs aizvasts nazynomā vērzīnī, a niule Reigā tārpynoj. Taida tei myusu tīsyskōs vaļsts paraugstuņde.” Plōciņu Maseit, taidu “reperatu” maņ nūlaseja Pļapatunu Donets. Pasoki, kur jam nav taisneiba?
Pļōpu Pīters
Komentāri