Muni dōrgiņkī, vasali šudiņ, vacō goda pādejā “Mōras Zemē”! Vēļ vīns gods kai strods aizalaidīs. I na tikai gods. Godusymts. Ar dyžkoncertim i pestivalym, ar boltim goldautim i dzīsmu svātkim, ar
lelim i mozim trikmīnim. Ar miljonu miljonim apnaudōts.
Myužeigs skaistums!
Cerēsim, ka ūtrajā godusymtā zeļs myusu Tāvaine, ka kotram byus darbeņš, byus maizeite, bērneni vairōsīs, rudzu dryvas viļnōsīs, meži zaļōs, vylki vuškeņas nadeirōs, lōči strūpus napūsteis, lopsas pa ūļneicom nagūļōs, tōrpi pa pogolmim narōpōs, ōbuļu klōjīni pūstā naaizīs, tymsajūs vīnsātu lūgūs gunteņas speidēs, nu skūrstynim dyumi dabasūs kōps…
Un mīrs vērs zemes vaļdeis un cylvākim byus lobs prōts.
Cīnejamī laseitōji, raksteitōji un dzejōtōji! Lels paļdis visiņkim par tū, ka “Mōras Zemi” losit, ka rokstit, ka mīļojit sovu volūdu un sovu Tāvaini, skaistōkū styureiti iz zemes.
Lai nōkamī 100 myusim visim atīt ar veseleibu, ar vysu lobu, ar syltu jauku vasareņ!
Ēdit casnāgus un byusit vasali!
Ar mīlesteibu —
Jyusu PLŌCIŅU MASE aba Anita GRAUDIŅA (Malahovska)
P. S. A jubilara Ontika (28.12.1948.— 15.12.2010.), kurs nu jau lobu laiku Dīva dryvōs raunās, skaitamī panteni moš paleidzēs myusu prezidenteņam gudru vaļdeibeņas gaļveņu atrast. Paskaiteisim?
Pl. M.
2018. goda 12. decembrī
Komentāri