Vasala, Plōciņu Maseit! Pļapatunu Donets itū reizi, kod satyku, īsōce par naudu: “Kam nav lelas naudas, tim pīteik vysam kam. Kam lela nauda, tī nazyna, kur jū likt. Padūmoj. Nu skūlānu formom atsasaceja dēļ tam, ka tys bārnus padora vysus vīnaidōkus. Naasūt īspēju bārnam parōdeit, ka jys nav taids kai visi.
Nu tagad to gon bārnim ir vysas īspējas dūtas. Kū naudeigōki vacōki, tū krutōki telefoni teik jūs atvasem. Krutōki datori. Kai ža muns bārns atpaliks nu sova klasesbīdra, kuram ir tōs dōrgum dōrgōs drēbes mugorā. Tī firmeigī, najēdzeigī kadaki kōjōs. Leidz ar tū gudreibas beņču mērkis sasnāgts. Tys līk bārnim navys vuiceitīs, bet ceņteigi nu sevis mērkača tālu veidōt. Nu i kaidu nōkūtni varom gaideit nu taida mērkača, kod jys deputatūs tiks? Jam tak smedziņu kapturs tukšs.
I vēļ. Moš dzērdēji, ka ir taids dōrgs monts kai “Rollexs” stuņdinīks. Vysā pasaulē tikai septeni. Bet prīceigōkō ziņa, ka vīnu nu tim nūpērcis myusu mozōs vaļsteņas bagaturs.”
Tai laikam ir. Kuram jau skūlā atļauts taiseit efekteigu mērkača tālu, tys, pi naudas maisa ticis, vysu myužu mērkačōsīs. Paļdis Dīvam, Maseit, ka na visi taidi. Ir vēļ pasaulē žāļsirdeigī. Ir vēļ daudz cylvāku, na cīši bogōtūs, kuri atsasaucās paleidzeibu akcijom un zīdoj naudeņu. Ir ari tureigī lobi ļaudis, kuri prūt sovu naudeņu mērktīceigi izlītōt un vēļ pīsadaleit žāļsirdeibas dorbūs. Lai naļaun Dīvs jim īt mozumā un myusu Latviju pōrvērst par mērkaču zemi.
Pļōpu Pīters
(2019. goda 1. februarī)
Komentāri