Atcerūs, cik kaidreiz skaisti latgaliski “Latvijas Radio” skanēja Bronislava Spridzāna raidējumi. Lai jam pateiceiba un myužeigs Dīva mīrs!
Šudiņ “Kolnasāta” ar surogatvolūdu tai apkrauta, ka galeigi izaškībuse, napateikami dzērdēt. Un kauns, ka tys nūteik munā Tāvuzemē — Latgolā. Tūmār jōdzērd, lai zynōtu.
Pīmāram, 19. janvara “Kolnasātas” golvonō varūne beja Iļža Sperga. Lai maņ pīdūd, ka naīgaumēju jōs daudzūs titulus, bet — lela persona. Par tū līcynōja saceitais. Un dižanō pōrlīceiba!
Lyuk, par ūtrū latgaļu literarū volūdu vyss asūt skaidrs un atrysynōts 2007. godā. Un jo bīžōk tū lītōšūt, jo lobōk un ōtrōk īīšūt apritē.
Tai ka napeikstit pretim! Šaubūtīs gon varu vēļ pībiļst, ka komunisma uzvara un PSRS myužeiba arī tyka propagandēta ar miļzeigim resursim…
Vēļ tyku apskaidrōts, ka P. Strods ar sovu dorbu palyka 1933. godā, un, ja nabyutu kara, PSRS okupacijas, ari jys (P. Strods) byutu īvīsis “čupu” burtus.
Lyuk, kaidas pareģa spējas, kai Finkam! Vysu cīnu, bet ari Finks ir kļyudejīs.
Beju pateikami pōrsteigts, ka I. Sperga īteice tīmār nalītōt “samaļotus” un cytus žargonvōrdus. Dūmu varu papyldynōt ar sovas mōtes (skūlōtōjas) kaidreiz teiktū, ka jei tykuse mōceita un poša bārnim mōcējuse par “skūlu”, “skūlānim” utt., navys slaviskōs formas. Šudiņ tōs ir beistamas ari politiskā ziņā, jo Latgolā cyttautīšu integracija kai buksēja nu sōkuma, tai buksej ari šudiņ. I. Sperga saceja: “Pateik fantazēt, nakai vērtīs olūtūs!” Pateišam, ni kō pīlikt, ni atjimt!
Pēc raidējuma parunōju ar Jōni Streiču. Jys uzskota, ka ļūti vērteigi byutu uzzynōt Latgolas (ari vysas Latvijas) pašvaļdeibu dūmas par tū, ka jom draud tōs ūtrōs rokstu (literarōs) volūdas īvīsšona lītvedeibā! Jā, fantazija bez rūbežom…
Jūlijs TRŌPS
Komentāri