Pīterdīnā
mes, literatu bīdreibas “Latgales ūdensroze” literati, braucem uz Ilzeskolna pogosta Jaungailumim, uz “Pūdnīku” mōjom, kur Maija Gailuma, keramika Pītera Gailuma dzeivesbīdre, reikōja Pīterdīnas pasōkumu. Šūs mōju saiminīks, talanteigais pūdnīks Pīters Gailums pyrms divim ar pusi godim spāka godūs aizgōja myužeibā. Pīterdīnā parosti jys sovā sātā pulcynōja draugus, rodus, omota brōļus. Lai ari Pītera Gailuma vairs nav, “Pūdnīkūs” ik uz sūļa jyutama daiļomota mōkslinīka klōtbyutne: par jū stōstēja atstōtī dorbi. Pogolmā beja apskotama Pītera pūdu kolekcija. Ja tai padūmoj, pūdi sasagloboj ļūti ilgi, pat tyukstūšim godu… Taitod ari pīmiņa nazyud. Maija Gailuma myusim izrōdēja Pītera darbneicu, kur uz plauktim salykti Pītera Gailuma dorbi — vāzes, pūdi, seikplastika, svečturi, bļūdeņas un citi mōla veidōjumi, ari divi eņgeļeiši. Pyrms pošas aizīšonas myužeibā meistars beja izveidōjis trejs taidas figureņas; vīnu nu tōm uzdōvynōjis prāvestam pēc Sliminīka sakramenta sajimšonas. Atlykušī divi ir dōrga pīmiņa ģiminei. Darbneicā apskotama ari datorā veidōta prezentacija par pošu keramiki. “Te īprīkš beja kūteņa, kū pyrms pīcim godim pōrbyuvējom par darbneicu. Beja projekts uzraksteits, finansējumu sajēmem, pasateicūtīs LEARN atbolstam. Tai kai te ir ari krōsneņa, tod ari zīmā var dorbōtīs,” stōstēja Maija Gailuma. Pēc tam braucem uz Gailumu kopim. Pi Pītera Gailuma kopa — sveces un zīdi, sveicīņs nu dzeivajīm, bet uz kopa kūpeņas keramikas lauskas… Kai atgōdynōjums par šō cylvāka dzeives misiju…
Aija MIKELE
AUTORES foto
Komentāri