Sōcūtīs lelō Sibirijas dzeļžceļa byuvnīceibai 19. godu symta vydā, ari daudzas tyukstūšas Latgolas dzeivōtōju atstōja dzymtū pusi i devēs iz Krīviju. Taipat jūs vylynōja skaistō doba, bezgaleigī mežu masivi, augleigō zeme naīrūbežōtā daudzumā. Sibirijas myuža meži beja bogōti ar meža zvērim — eists atrodums medinīkim. Yudiņa krōtuvēs natryuka ni zyvu, ni yudiņa putynu. Latgalīši Sibirijā dzeivōja pōrtykuši i beja apmīrynōti ar dzeivi. Precizu Latgolas izceļōtōju skaitu navar nūsaukt. Skaitli ir dažaidi, videjais — ap 80 000. Ir mynāti pat 220 000, Pīterpilī vīn — 15 000. Tai Krīvijā izaveidōja lelas latgalīšu kolonijas, kas vēļ ilgi uzturēja sovu tautiskū apziņu. Storp vodūšīm kulturas darbinīkim mynoma Vera Daškeviča. Dzymuse Preiļu nūvoda Sylajōņu pogosta Rībeņūs 1897. godā. Jōs brōļs beja Gajevskis, kuru 1905. goda revolucijas laikā nūšōve žandarmi. Gajevska pīmiņas vīta atsarūn pi Rēzeknes, Reigas – Zylupes i Daugavpiļs – Kōrsovas ceļu krustōjumā. Nu 1911. leidz 1915. godam Daškeviča vuicejōs Preiļu augstōkajā tautskūlā, pēc tam Pīterpiļs skūlōtōju sagatavōšonas kursūs. Pyrmō pasauļa kara laikā strōdōja bīdreibā “Paleigs kara upurim”, nu 1917. leidz 1918. godam beja skūlōtōja Preiļu tautskūlā, kaidu laiku ari instruktore Viļānu apriņka skūlōs. Kara beigōs Vera palyka Krīvijā i strōdōja turīnes latgalīšu skūlōs. 30. godūs pōrgōja uz izdevnīceibas “Prometejs” latgalīšu grōmotu nūdaļu. Radejuse vairōkus dorbus pedagogijā: “Latgalīšu volūdas mōceiba”, “Literaturas hrestomatija”, “Latgalīšu volūdas gramatika”, “Ortografijas vingrinōjumi” pamatskūlom i napylnom vydusskūlom (napylna vydusskūla tūreizejā Krīvijā — sešas klases), “Bārnim par zvārānim”, “Lauksaimisteibas rokstu krōjums”, “Orōju zeme”, “Ābece” (losamgrōmota), “Dorbs” (losamgrōmota latgalīšu skūlānim). Vera Daškeviča sovu misiju redzēja latgalīšu tautas volūdas saglobōšonā, kūpšonā i ceļšonā civilizētas volūdas stōvūklī. Krīvijā izgōja 67 dažaidu nūsaukumu grōmotas. 30. godūs ari Vera Daškeviča kryta Stalina režima nažēlesteibā, tyka nūtīsōta uz 20 godim i izsyuteita uz Turkmeniju, strōdōja Zolotanas vydusskūlā, tod Kazahijā. Pēc piļneigas reabilitacijas dzeivōja Tulas apgobola Aleksinas piļsātā i 1960. godā aizgōja myužeibā. Taids eisumā ir myusu nūvodneicas Veras Daškevičas dzeives stōsts, kas prosa sovu vītu Latgolas kulturvēsturē.
Pīters LŌCIS,
Latgalīšu rakstnīceibas muzeja vadeitōjs
Komentāri