Vasala, Plōciņu Maseit! Itū reizi Pļapatunu Donets maņ vaicōja: “Pīter, voi tu zini, kaida ir jaunūs laiku Latgolas īlas vēsture?”
Es jam kai paklauseigs skūlāns soku: “Pyrms goda 1. oktobrī Rāznē atklōja Latgolas īlu pēc rekonstrukcijas. Tai par ļaudim klapatej piļsātas dūme.”
Donetam nacīš kū patyka muna atbiļde, jys beja naļūdns un saceja: “A tu, Pīter, esi īvārōjis, ka tamā īlas pusē, kur katedrale, trotuars trejōs jūslōs sadaleits: vīna nu plōksneitem, ūtra nu asfaļta, a trešō — gara akmisteņu streipe. Zīmā jū pat klīners nateirej, vosorā cylvāki pa jū naīt: kōjeņas matās. Trotuars dūmōts deļ gōjējim. A tei akmisteņu streipe dēļ kō dūmōta? Naz, kas zīmā tūs akmisteņus teirej? Ni mašiņa ar sovu “slūtu”, ni sētnīka škipele leidzēs.”
Strāči nūrunōjis, otkon maņ vaicoj: “A tu trenažerus redzēji?” Napaspēju muti atplēst, jys jau purp: “ Rozlyka pa vysu ūļneicu, a pedaļus dalikt aizmērsa. A moš kaids nūzōdžēja metallomam. Labi dūmōts laikam beja. Ļauteni sportōtu.. par veļti.”
Tod Donets, laikam jaunōkūs ziņu sasaklausējīs, vaicoj: “Zynom, ka Latvija demokratiska vaļsts. Soki, kaida vēļ?”
Es soku: “Tīsyska.”
Donets turpynoj: “Teļevizerī rōdeja, ka bejušais vida šefs Sončika kungs vaļsts mōjas uzlobōšonā īguļdejis divejus symtus tyukstūšu un naatstōj tū sātu. Ni tīsa, ni tīsas izpiļdeitōji navar nikō padareit. Tai vaļsts pōrstōvi ryupejās par vaļsts pōrstōvim.”
Es jam varēju tikai pīkrist. Maseit, kai Tu dūmoj?
Pļōpu Pīters
A. GRAUDIŅAS foto
Komentāri