Itaidi svātki ir vīnmār gaideiti, jo sasateik autori un laseitōji, teik pōrrunōtas šudiņ aktualas lītas. Tyka runōts par latgalīšu volūdas saglobōšonu, ka tei jōmōca bārnim (dīmžāl vacōki tū nadora). Pasōkuma daleibneica, pensionētō skūlōtōja Regīna Novika teice: “Teiru, skaistu latgalīšu volūdu dzēržu tikai bazneicā…” LKC vadeitōjs Jōņs Eļksnis pastōstēja, ka šūgod deveņūs mēnešūs izdūtas 13 grōmotas: Valentīna Slavinska “Laiks”, Jōņa Cybuļska “Veritas nostra est”, Jūlija Augusta Tropa “Vactāva pādūs īt”, Ivana Sircova “Piļsāta Zylupe un Zylupes nūvods” (krīvu volūdā), “Represēto maltēniešu likteņstāsti” (2. izdavums, pīrakstejuse Anna Babre), Jōņa Svenča “Gadu ritumā”, Annas Babres “Mūža josta II”, Veronikas Grišānes “Mēs savai tautai II”, Leontinas Apšeneicas “Kaķu simfonija”, Venerandas Andžānes “Pēdas dzīves grāmatā”, literatūras almanahs “Olūts”, “Piemineklis un laiks” (ūtrs, papyldynōts izdavums), ar Raimonda Krasinska atbolstu izdūta “Mōras Zeme II” (kulturvēsturiski un religiski izgleitojūši roksti, kas nu 2001. leidz 2004. godam publicāti laikroksta “Rēzeknes Vēstis” lopaspusē “Mōras Zeme”), Marijas Brokānes “Brokānu dzimta” un “Tāvu zemes kalendars 2020”. Izdevējs seikōk pastōstēja par kotru nu iznōkušajom grōmotom. “Par “Tāvu zemes kalendaru” jōrunoj vysvairōk, tei ir poša golvonō grōmota. Kalendaram ir jau 81. godagōjums, bet myusu izdevnīceibā — 30-tais. Daudz rokstu ir par vēsturiskim tematim. Runojūt par pagōjušīm laikim, moz pētejumu par muižinīkim, par jīm vajadzātu raksteit. Taipat jōroksta ari par kolhozu laikim. Tikai rokstim jōbyut patīsim, lai namōneitu laseitōju. Kalendarā, ari “Olūtā” publicejom taidus materialus, kas īprīkš nav publicāti,” stōstēja Jōņs Eļksnis. “Jōsoka, strōdojam gryutūs apstōkļūs ar minimalim leidzeklim. Bet turpynōsim izdūt. Lels paļdis izdevnīceibas redaktorei Valentīnai Undas kundzei un citim darbinīkim,” teice izdevējs. Taipat tyka atgōdynōts, ka roksti “Olūtam” un “Tāvu zemes kalendaram” jōīsnādz laiceigi, lai varātu pīsadaleit projektu konkursūs. Ja klōt nav pīvīnōts manuskripts, leidzekļus napīškir. Ir prīks, ka LKC izdevnīceiba strōdoj tik ražeigi. Lai loba veseleiba grōmotu autorim un izdevējam!
Aija MIKELE
Eduarda UTĀNA foto
Komentāri