Tys pats sokams par Latgaļu rokstu muzeja liktini. Muzejam vajadzeigi trejs darbinīki. Vīns teišam muzeja dorbam — fondu apstrōdei, izstōžu reikōšonai, ekskursiju nūvadeišonai. Sovā jūmā vajadzeigs latgaļu literaturas specialists. Muzeja saimesteibas uzturēšona prosa divus cylvākus — apkure, remonti, kōrteibas uzturēšona telpōs, teritorijas sakūpšona. Naz voi piļsātā ir taida muzejam teritorija i īspējas. Latgaļu nacionalōs idejas nu vaļsts puses nateik īvārōtas, vyss nūteik iz privatas iniciativas pamata. Vajadzeigi latgaliskas pōrlīceibas cylvāki vai saime, kas byutu ar mīru zīdōt sovus leidzekļus, dorbu, sovu dzeivi latgaļu leidztīseibas idejas vōrdā. Vladislava Lōča senči vairōkōs paaudzēs ir bejuši kaļvi. Lōčusolā Drycānu pogostā beja uzbyuvēta pamateiga akmiņu smēde, kur tyka dareiti dažaidi kaļšonas dorbi apleicīnes īdzeivōtōju vajadzeibom. Smēdes drupas vēl aizvīnam radzamas. Pi īejas smēdē beja nūvītōts miļzeigs dzērnovu akmiņs ap 1,5 m caurmārā, kū kaļvs izmontōja rogovu slīžu i skrytuļu līkšonai. Nu jau vairōk kai gods pagōjis, kūpš tys akmiņs ir pazudis. Dūma beja akminī īkaļt tekstu i nūvītōt tīpat sātas vītā kai līceibu Vladislava Lōča dzymtas pīmiņai. Lyugums visim gūda prōta cylvākim, kuri zyna, kas aizvede akmini, voi ir redzējuši akmini cytā vītā, pīzvaneit.
Mob. tel. — 26667368.
Pīters LŌCS
P. S. Prūtams, taisneigōk byutu vēsturiskū akmini atdūt.
P. L.
Komentāri