Vasala, Plōciņu Maseit!
Cīši labi, ka ari tu turīs sprauna un nadūmoj ņi par kaidim baiļu čapāslym. Golvonais reikōtīs. Bet tū, kam byut voi nabyut, mes navarim izavēlētīs. Vyss Dīveņa varā.
Itū reizi Pļapatunu Donets īsōce tai: “Kars bez kara. Kū asam peļnējuši, tū ar sajemam. Cylvākim, kas teik pi varas, napateik mīrā dzeivōt. Tī, pi varas siļes, nūteik taidi kareņi, ka tikai turīs. Par omotym, par syltōku vīteņu. Tai vysur ir politikā. Nu ka vysa pasauļa tautu politiki nagrib mīrā dzeivōt, tod lai sajem tū, kū peļnējuši. Nazkaidu virusu nu nazkaida izceļsmes veida. Nu tod tagad lai strōdoj, lai gōdoj, lai napalaiž vējā. Tod byus taida “patasovka”, ka tikai turīs. Pyrmais viļņs jau pōri. Rudiņī byušūt nōkamais. Augstōkī spāki zyna, kū vajaga taidom demokratiskom vaļsteņom, kuru pōrvaļdeitōji sovā storpā navar padaļeit lelōku ļizeiku. Tai izīt kars bez kara. Nu tagad karojit tōļōk sovā storpā un esit uzmaneigi, ka napalaistu virusu tōļōk, a to vyss dorbs byus kai caurajā budžeta maisā. Cik īļiks, tiks izbērs.”
Tys vyss sokamais beja Donetam.
Plōciņu Maseit, palīc vasaļiņka leidz cytai reizei.
Pļōpu Pīters
Komentāri