“POĻU INFLANTIJA”

Pūlijas Republikas vēstneica Latvijā Monika Mihališina par grōmotu soka: “Laseitōju vērtējumam nūdūdam Gustava Manteifeļa grōmotu “Poļu Inflantija”. Kaut gon deveņpadsmytō godsymta pētnīks sovā dorbā naizteik bez subjektivisma devas, tūmār tys ir ļūti nūzeimeigs vēsturisks olūts, kas aproksta latvīšu zemju vēsturi. Esmu dziļi pōrlīcynōta, ka divōs volūdōs izdūtō Manteifeļa grōmota “Poļu Inflantija” na tikai spēs iepazeistynōt ar vēstures nūtykumim un regiona multikulturalōs identitates bogōteibu, bet ari pamudynōt pūļu un latvīšu vēsturnīkus uz dziļōkim pētējumim.” Sovukōrt Pūlijas Kulturas montōjuma ōrzemēs nacionalō institūta “Polonika” direktore Dorota Janiševska-Jakubjaka soka: “Myusdīnu Latgale, kū seņōk sauce par pūļu Inflantiju, ir regions ar īpošu sovdabeibu. Kōdreiz tys atsarodōs Zečpospoļitas sastōvā, pēc pyrmōs daleišonas tys īkļauts Krīvijas imperijas rūbežōs, bet pyrms vairōk nakai 100 godim kļiva par naatkareigōs Latvijas daļu. Zynōtnīkim, kuri pētej senōs Inflantijas vēsturi un kulturas montōjumu, par sōkūtnejū olūtu naapšaubami uzskotami barona Gustava Manteifeļa, pōrpūļōjušōs Manteifeļu-Scēgu dzymtas nu Drycānim pōrstōvja, dorbi. Mes ceram, ka pīdōvōtais senōs pūļu Inflantijas vēsturei veļteitais izdavums latvīšu volūdā plašam laseitōju lūkam ļaus tyvōk īpazeit šū naparostū pētnīku.”