Daudzu godu garumā ir izaveidōjis autoru kolektivs, kam pasateicūt mes varim sagatavōt un izdūt literaturas almanahu “Olūts”. Jau vairōkus godus pēc kōrtas “Olūts” iznōk ar Vaļsts kulturkapitala fonda konkursūs pīškērtū finansejumu, Rēzeknes piļsātas dūmes un dažu uzjēmēju atbolstu. “Olūts” un “Tāvu zemes kalendars” ir vīneigī regularī izdavumi, kas izīt latgalīšu literarajā (rokstu) volūdā. Tys ari atļaun mums kūpt myusu literaturu, volūdu un tōs raksteibu, kas izstrōdōta Pītera Stroda vadeibā jau tōlajā 1928. godā. Projekts nōkamajam literaturas almanaha “Olūts” laidīņam jōsagatavoj jau šō goda beigōs, un 2022. goda janvarī tys jōīsnādz Vaļsts kulturkapitala fonda kōrtejam projektu konkursam. Pi projekta jōpīlīk ari publicejamī dorbi. Tōpēc ļūti lyudzu autorus sovlaiceigi īsnēgt sovus dorbus (stōstus, dzejūļus, lugas u. c.) izdevnīceibā, lai tūs varātu izvērtēt, atlaseit, izredigeit un īvadeit datorā. Lai myusim visim veicās!
Par “Tāvu zemes kalendaru”.
Cik zynoms, pošlaik Latvijā vacōkō godagrōmota ir “Tāvu zemes kalendars”, kas izīt nu 1939. goda. Kalendaram jau ir izgōjuši 83 godagōjumi. Kalendars ir kulturvēsturiska un literara godagrōmota ar bogōteigu saturu. Varbyut tōpēc kaids myusu laseitōjs tū nūsaucis par mozū Latgolas enciklopediju. Turpynōsim ari turpmōk izdūt “Tāvu zemes kalendaru”. Vairōkus godus pēc kōrtas “Tāvu zemes kalendars” ir iznōcis ar Latgolas atteisteibas agenturas, Vaļsts kulturkapitala fonda un “Latvijas vaļsts mežu” atbolstu, taču sajimts ari Rēzeknes piļsātas dūmes, uzjēmēja Jōņa Blaževiča, Raimonda Krasinska un vēļ dažu laseitōju atbolsts. “Tāvu zemes kalendara” projekts jōīsnādz 2022. goda martā. Tam jōpīlīk klōt ari publicejamī roksti. Tōpēc jōstrōdoj jau tagad, lai sagatavōtu šūs rokstus.
Jōņs EĻKSNIS
Komentāri