“Rēzeknes Vēstis” jau raksteja, ka Rēzeknes Latgalīšu kulturas bīdreiba 13. septembrī Rēzeknes Augstskūlā reikōja monsinjora Nikodema Rancāna 145 godu atceres pasōkumu un gūdynōja izcylōkūs Latgolas skūlōtōjus, pīškirūt jim N. Rancāna bolvu. Rēzeknes Latgalīšu kulturas bīdreibas vaļdes prīkšsādātōja Līvija Plavinska pastōsteja, ka pyrms tam bīdreibas pōrstōvi apmeklēja Nikodema Rancāna kopa vītu Rēzeknes Mīra īlas kopsātā. Pīmineklis beja ļūti slyktā stōvūklī, kopa apmale sadrupuse, bet marmora plōksneite ar syunom apauguse. Bīdreiba par sovim leidzeklim sakōrtōja monsinjora pīmiņas vītu. Pīminekli atjaunōja, kopa apmales nūmaineja pret plāksni, un marmora plōksneites restaurēja pīminekļu meistars Juris Apeināns nu Greiškānu pogosta Dreizim. “Vyss tyka izdareits ļūti ōtri un kvalitativi. Paļdis Juram!” saceja Līvija Plavinska.
Aija ZUJA
Komentāri