Jezupa dīnā Maltā varēja pasmaideit, pasasmītīs un apsarunōt ar Latgolas humora karalīni – Plōciņu Masi jeb Anitu Graudiņu, kai ari sajimt dōvonā jōs grōmotu “Plōciņu Mase roksta” ar autografu. Bet myusu draudzeiba ar Plōciņu Masi sōcēs daudz agrōk. 2010. goda 6. martā Maltā nūtyka I Plōciņu Mases festivals. Bet pārņ 2. oktobrī, kod Latgolas Kulturvēstures muzejā nūtyka Plōciņu Mases grōmotas prezentacijas pasōkums, syutējom jai video īrokstu ar sveicīni. Kas izsaceits skaļi, tū kabatā nanūslēpsi. Laiki gon taidi “kovidaini”, varbyut var saīt kūpā, varbyut nā. Sarunōjom ar Anitas kundzi, ka Jezupa dīnā byutu labi. Kai to nā, pat bazneicā atļauts laulōtīs! Vyss jau labi gōja. Tik tys mūškis “kovids” otkol pasōka ļauteņus ščupineit ar tīm sovim baileigīm pērstim. A vai, a vai! Gaigalovas Mases tikkū kai atsakratējušōs nu tō pretekļa, bet Nagļu Mases tikkū kai sōcis ščupineit, Viļānūs sovas jam lītas, labi, ka Viļānu Roza paspēja pādejā minutē atšaut leidz Maltai un pasprāgōt ar sovom gudreibom. Nu kai jau latgalīši! Viļānu Roza (Alla Kozlovska) beja na tikai ar sovu trikmīni, bet vēļ leidza teikleņā valnōbuļus īsvīduse un valna dziru īlējuse, myusus pacīnōja. Maltas Naaizmērstuļu Mase (Anna Kupcova) izstōsteja “Kai pi Backas cīmūs braucem”. A Borbaleņa Mase (Valentīna Miklaševiča) izstōsteja un izarōdeja ar sovu trikmīni “Apreikōšona”. Nu rikteigas Mases! Jōsoka, sovu pyrmū “bērneņu” – trikmīneiti pasaulē palaidušas. A Pļotku Mase (Elīna Prusaka) spēre laseit Plōciņu Mases vēstules “Nūst ar spičkom!” un “Cīši loba dzela”. I kur bez myusu līnijdeju Masem (Valentīnas Miklaševičas, Vēsmas Ušpeles, Ineses Bunderes) un danču Mases (Rutas Mikas)? A nikur! I tai mes tī kaitejom, smējamēs un duračējamēs Jezupa dīnā Maltas kulturas nomā. Cikom Plōciņu Mase daleja autografus, Plōciņu Mases gordais svātku plōciņs sasarōve mozōks un mozōks. Nā, nā, pats sakasneits tyka pošai Plōciņu Masei. A maņ, Pļotku Masei, un visim, kas beja sagōjuši, sabraukuši, lai breineigs vēlējums…
Elīna PRUSAKA
Normunda ŠTEKELA foto
Komentāri