Vasala, muna dōrgiņkō Cecileit! Nagļu trikmīņs “Es asu, tu esi Plōciņu Mase” beja myužeigs skaistums. Mašu beja daudz, zals beja pylns ar fanim i fanem. Sirdssyltums plyuda pōri molom. I sātmaleits pi skotuvis, ar rūku darbenim adeitīm i austīm izdaiļōts (nu tim maņ vīns breineigs syltu kabzečeišu pōreits tyka). Mareitis adeitōs dzaltonōs škarpatkenis kai cepleits naktīs munys djapeitis sylda. A pi zala sīnys nu bejušōs posta prīkšneicys Otilijas breineigīm gobelenim Latgaleite kotru apmīļōja. Myužeigs skaistums! Sirds pamyra, kod īraudzēju ļaužu pylnū zalu. Okulery aizsveida! Kū gveļžu, eistyn vaira napīmiņu… Zosja soka, ka dzelu runōju. Kai gudreibys beņči gryb pamastūs Latgolas kōrmus atdzeivynōt. Ļauteņus iz sovom dzeravņam, foļvorceņom, solom atgrīzt. Pi reizes EiroSabys iztukšōtū “pašeli” nu latvjōnim i canadys zalta slūteņom atpesteit. Tūs to žāļ. Cīši smuki dzaltonī teirumi izaverās. Koč myusu nacinalōs pučeitis peipineitis na švakōkys. Myužeigs skaistums! Vaicōsi, kai dzeravnis renimēt? Ka vysiņki aizalaiduši… Kai, kai? Myužeigs skaistums! Prosta tei dzela beja vītejīm gudreibys beņčeišim. Nūsprīduši, ka jōpaceļ moksa par pansinatim. Nav kō tī vecelim vōļōtīs bezdarbeibā. Pusūtru tyukšu (1480 eirikus) mēnesī prosūtj moksōt. Nu kur tōm asem, masem, jugasem ņiuļa liktīs ar sovu uboga peņsejis simteni… Jōbļaun ratunkys? Bļauņ ci nabļauņ – vīns peips. Vīna lyga – ni dzērd, ni redz tymūs beņčūs tykušī. Pēc vēlēšonu okly i kūrly palīk kai iz sitīņa. Myužeigs skaistums! A niuļa myusu seņjōrim byus jōkustynoj smedzeņu kaptureiši. I na tikai. I pērsteni, i rūcenis, i kōjenis… Tupu rōpu jōkužynoj sovys sotkenis. Puču dōrzeņā flokši sōks smaideit! Oka dzīdōt sōks. A nu zemis spāks byus kaulūs… Koč kropi jōīsēj. Moš kazeņu iz pōrs sātom nūpērks voi panaimavōs, skolus plēss, žogorus laseis. Tymsūs vokorūs vakarēs… Tolkavōs… A tod jau i bārni nu svešōm zemem atsagrīzs, i pi myusu bārnuki sōks dzimt, i slāgtōs školys otkon zumēs kai bišu strūpi… Atdzims Latgola. Myužeigs skaistums! Zose soka, ka nazkod, pagōjušajā godusymtā, bejuse mūdē dzīsme “Vairōsimēs Latvijai..”. Pādejais laiks itū saukli ceļt gaismā, koļeņc naasom izmērdeiti… Myužeigs skaistums! A Nagļūs, Ceceit, to beja prīca dvēselei i pēčōk mīsai! Smējūs, vādaru turādama, osorys slauceidama, kod Nagļu Tautys noma Annenis mjaituškys anekdotus iz dzeivis stōstēja. Vēļ i Gaigalovys “Apeiņs” smīdynōja. A kaids syltums plyuda nu skotuvis, kod pasarōdēja Modyunis Sauliskolna doncōtōjis. Myužeigs skaistums tys beja! Paļdis i paļdis acīs i aiz ocu muzykantam Jōneišam Trūpam i jō ansambļam. Jōneiša golvā dzymuse ideja Plōciņu Masi tauteņōs vest. Par gūdu jōs 30-gadei turneju planavoj. Izcēle mani kai vacu baku. Ar lelu Zoses gribēšonu i Puļgeņces paleidzēšonu. Paļdis vysiņkim tyvlejīm i tōlejīm, kuri pōrpiļdēja zalu, paļdis par manis pīminēšonu. Myužeigs skaistums! A kaids ceļamaizes peirāgs beja! Kilogrami pīci, ka na vairōk. Kūpā ar Zosi i Puļgeņceju “lupcavōm” vysu nedeļu. Itū plōciņi izcepe i dāravōja Zineite. I lelu paļdis (paleidzi, Dīvs!) vēlējam Anneņai Baleišai un vysom jōs noma universalōm saimineicom. Tōs prūt i dzīdōt, i doncōt, jūkus pļāst, i gūs slaukt, i peirāgus cept, i iz mēginōjumim aizskrīt. Tys ir Latgolys myužeigīs skaistums!
Tova Plōciņu Mase
2023. goda 28. februarī.
P. S.
Tici voi natici, Cecilej, pēc itō pasōcīņa laimis kormoni plidejās kai iz mīļu: nadūd vairs mīra. A Maltā jau brīst kōrtejais, “Trešais Plōciņu Mases pestivals”. Kur tu spruksi? Byus jōbrauc.
Ceceit, dōrgiņkō, lidoj šur! Moš da Jezupa dīnas paspēsi?
Pl. M.
Komentāri