⇒ Vaļdeišona myusim stōsta, ka krīze veiksmeigi pōrvarāta un ekonomika aug. Mes, vīnkōršī mērsteigī, redzim, ka aug viņ bezdorbs, nūdūkli, cenas… Kū padareisi — izsolkušais seitō nasaprūt. ⇒ Kurynōtōjs sasiļdeja telpas. Nūvoda prīkšnīceiba jū lomoj par naracionalu kurynamō patēreņu. Temperaturu samozynōja — tagad jū lomoj par tū, ka solts. “Nalītas! Lobōk iz reizes pasaceitu, ka itei dorbavīta vajadzeiga vīnam sovam cylvākam,” nūdūmova kurynōtōjs. ⇒ Kūmas Odumīne un Jerupīne, “Maximā” sazatykušas, sprīž par lelajōs putnu fabrikōs dātom ūlom, inkubatorūs mōksleigi izparātim cōlim, putnu gripas epidemiju, genetiski modificātim broilerim… Golu golā obas tūmār nūsprīž, ka sovas vystas audzēt naatsamoksoj: dōrga sintetiskō bareiba un kimiskōs pīdavas, lela mōksleigi parātūs cōļu mērsteiba. Ari navar nūsorgōt nu pōrmēreigi sazavairōjušom lopsom, kas nasabeist vairs ni nu sunim, ni nu cylvākim ar šautinem. Kū padareisi, jōād leitovīšu lelveikalā pērktōs ūlas un jōgrauž mōksleigi barōtūs broileru stylbi. ⇒ Sludynōjums internetā: “Dorbam Zvīdrijā vajadzeigi byuvstrōdnīki, obligata krīvu volūdas prasme.” ⇒ Volūdas referenduma rūsy-nōtōji “īsadaguši” ar Latgolas autonomijas ideju. Svāta līta: tōs dēļ prīsteri Franci Tra-sunu īdzyna kopā, politiki Franci Kempu vozōja iz pratynōšonom politpōrvaļdē, veiskupu Jezupu Rancānu turēja mōjas arestā… Tymā grupējumā nav nivīna latgalīša. Naatroda voi ari nagribēja meklēt… Judaša. ⇒ Skūlōs nūteik “ānu dīnas”. Skūlāni labprōt “ānoj” prokurorus, policistus, rūbežsorgus, žurnalistus, zemessorgus, muitnīkus… Nivīns nav gribējis byut par zemnīka “ānu”. ⇒ Dorba devēja filozofija: par elektreibu jōsamoksoj, jo nā – atslēgs. VIDam nūdūkli jōsamoksoj, jo nā — apstrōpēs. Bolku pīgōdōtōjim jōsamoksoj, jo nā — vairs navess. Olga strōdnīkim… ari jōsamoksoj, bet – tī var dažus mēnešus pagaideit. ⇒ Vēlēšonas. Plōciņu Mase dūmoj: bolsōt voi nā?! Kaida jāga. Vēži tī poši, tagad ari kuleite tei poša… Jōbrauc lobōk iz Kaliporniju, tōlōk nu vysa itō balagana. Stuņdi pyrms vēlēšonu īcir-kņa slēgšonas jei tūmār nūlem bolsōt. Vēlēšonu komisijas klerki jū pōrsteidz: “Ej iz sātu, tu jau nūbolsovi… par kū vajag.” ⇒ Kōrtejū reizi sprīž par demografiskū situaciju vaļstī. Kōrtejū reizi vaļdeišona pīškir leidzekļus… dorba grupu organizēšonai, plānu sastōdeišonai, projektu raksteišonai, konferenču reikōšonai. Taitod — birokratu mokim, navys bārnim un giminem. Kōrtejū reizi.
Leonards Rakickis
“TZK”
Komentāri