– Skūlā organizēja bārnudōrza grupeņu. Reiz vīns bērneņš nu stresa apsačurōja. Audzynōtōja un aukleite zvanejōs pa vysu pogostu, bērneņa mameiti maklādamas… Varbyut jom matās naloba dūša? Varbyut paidagogiskā skūlā nav labi vuicejušōs? Varbyut par “smolkom”? Bet varbyut tryukst gūdaprōta kōrteigi dareit sovu maizes dorbu. – Televizijā diveju varas olkstūšūs partiju vodūņu “divkauja”. Vīns līlejās, ka atjaunōjis Latvijas armiju un īvedis vaļsti NATO. Ūtrs sūla 50000 dorbavītu ar videjū olgu 600 latu mēnesī. Prōtā īskrīn diveju kūrlūs saruna: “Kur tu, sābreit, īsi — sīna pļaut?” “Nā, nā! Sīna pļaut!” “Ā, es dūmovu, ka sīna pļaut…” – Myusu dorba devēji pylnā reiklē vaimanej par strōdnīku tryukumu. Taču dorba maklātōjim stōsta, ka vakances aizjimtas. Ari sludynōjumūs nūrōdeitī telefoni naeksistej voi vīnmār aizjimti — pat pusnaktī. Laikam gon kungi ni zyna, kū dora, ni apjādz, kū grib. – Televizijā četri “veči” sprīž par elektreibas breivū tērgu. Vīns bīdynoj ar cenas ceļšonūs; ūtrs soka, ka nabyus tik troki; trešais prīcojās par konkurences pasarōdeišonu; catūrtais nazkū mūrgoj, nikō jēdzeiga napasokūt. Pīredze gon rōda, ka itaidūs pasōcīņūs zaudātōji byusim mes — vīnkōršī mērsteigī. Taitod atsagrīzsim akmiņs laikmatā, kungi, — pi skolim, svecem un petrolejas lampom! – 9. maja pīvakare. Rēzeknē, laukumā pi “Aļošas” puļcejās publika, sarunōs pōrsvorā dzēržama “ūtrō vaļsts volūda”. Lelōs “tumbas” atskaņoj Sorkonōs armijas maršus un kara dzīsmes. Pīminekļa pakōjē grūzōs veirīts ar Georgija lenteiti pi kryutim — piļsātas golva. Jo jau esi “golva”, nav jōdūmoj ar sēdēšonai paradzātū vītu! Izgrīztūs kūku vītā uzstōdi nūjumes, lai byutu āna, kur cylvākim pasaglōbt nu saules; salic atpakaļ aizvōktūs sūleņus, kur pīsēst; saremontej pārņ lyktūs, bet jau brukt sōkušūs trotuarus, lai kara eļni izgōjušajim veceišim naaizamat kōja… Varbyut itī svātki jūs zemes dzeivē ir pādejī. – Kaimiņš paleidz sābram nūkrōsōt mōjas sīnas. Pēški policijas specvīneibas pavadeibā īsarūn VIDa inspektori un obim pīsprīž pa pustyukstūšai strōpes par dorbu bez leiguma… Žurnals “Praktiskais Latvietis” vysā nūpītneibā vuica sovus laseitōjus: vajag slēgt dorba leigumus sīna un kartupeļu tolkom u. c. Kur myusu tautas sadzeives tradicijas lai palīk? Kur golu golā klerku vasalais saprōts?! – Nu Vōcijas (stōsta, ari nu ASV) nav sazvonami Latvijā fiksētūs tōlruņu abonenti. Vōcu puse skaidroj, ka vaine meklejama Latvijā… Varbyut sōcis dorbōtīs vaļdeibas steigā “izparātais” reemigracijas plans?! Tai kai dorbavītu Latvijā nav, olgas mikroskopiskas — palīk viņ sabūjōt sakarus… Varbyut tod, navarādami sazvaneit dzimtinē dzeivojušūs tyvinīkus, aizbraucēji atsagrīzs? Vyss pusmiļjons.
Leonards RAKICKIS
(“Tāvu zemes kalendars”)
Komentāri