“Olūts” un “Tāvu zemes kalendars” ir vīneigōs grōmotas, kas latgalīšu volūdā iznōk kotru godu. Pi itom grōmotom, taipat kai pi vysom cytom, Latgolas Kulturas centra izdevnīceibā teik rikteigi strōdōts. Dīvamžāļ napīteik sovas naudas. Grōmotas teik izdūtas ar atbaļsteitōju paleidzeibu. Un darbinīki pošaizlīdzeigi ceņšās, lai grōmotu saturs byutu pēc īspējas lobōks, vērteigōks, interesantōks un laseitōjam aizraujūšōks.
Tai kai Latgola pōrsalatviskojās, aicynoju tūmār saglobōt sovu volūdu un vairōk laseit grōmotas latgaliski. Vuiceitīs volūdu nu jauna, lai koč kai tys nūteik. Golvonais, ka nūteik. Kur gon vēļ lobōk var vuiceitīs kai losūt lobu literaturu, kas nūdrukōta profesora Pītera Stroda ortografejā. Napasadūsim. Laseisim.
Itōs lobōs grōmotas, “Tāvu zemes kalendaru 2016” un literaturas almanahu “Olūts”, deļ sova plaukta voi lobai dōvonai bez veikala uzcenōjuma vēļ varot īsagōdōt LKC izdevnīceibā Rēzeknē, Bazneicas īlā 28 (I stōvā). Jōsoka, ka obūs krōjumūs, kai vysod, tikai taidi sacerējumi, kurus nikur cytur naatrassit. (Storp tīm ari muni darbeni, kas nikur nav publicēti.)
P. MEIKSTUMS
Komentāri