Latgolas Kulturas centra izdevnīceiba ar lelō labdara Raimonda Krasinska finansialu atbolstu laseitōjim Latgolā sagatavōjuse breineigu dōvonu — bīzu jo bīzu grōmotu “Mōras zeme II”, kur vīnā vītā salaseiti roksti par Latgolu, latgalīšim, jūs dzeivi, ticeibu, uzskotim. Roksti, kas nu 2001. goda beja drukōti “Rēzeknes Vēstu” latgaliskajā lopā “Mōras Zeme” (“Mōras zeme I” izdūta 2017. g.). Itei vysā Latgolā popularō tematiskō lopa pi “Rēzeknes Vēstu” laseitōjim nōk jau 22. godu. Ideju izauklējuse Anita Graudiņa, kura godu gaitā ap “Mōras Zemi” sapulcynōjuse kuplu laseitōju i raksteitōju pulku ar Plōciņu Masi prīkšgolā. Skaista dōvona visim, kas grōmotu laseis. Jo patīseibā tei ir Latgolas un šōs zemeites cylvāku ikdīnas dūmu, dorbu, ryupu i prīcu atspulgs. “Rēzeknes Vēstu”, taitod ari “Mōras Zemes” laseitōji un raksteitōji, škirstūt skaistū grōmotu, drūši vīn breinēsīs: “Vai teišam mes visi kūpā asam tik bīzu grōmotu sarakstejuši?” “RV” tematiskō lopaspuse “Mōras Zeme”, kas iznōk regulari vīnu reizi mēnesī, ir laseitōju īcīneita un īmīļōta. Par tū līcynoj daudzōs atsauksmes par kotru rokstu. Kaida “RV” pastōveigō abonente un laseitōja nu Reigas rajona Zaķumuižas pārņ pīzvanēja redakcijai, lai pasadaleitūs prīcā: jei par itim godim īsamōcejuse laseit latgaliski, jai pateik “Mōras Zeme”, roksti par bejušīm un tagadejīm laikim. Grōmotā daudzi roksti veļteiti nūpītnom Latgolas problemom. It seviški laseitōjim patiks pōrlaseit Plōciņu Mases vēstules draudzinei Cecilei Kalifornijā. Grōmotā kai zeileites čārmyukšu kreļļu virtenē savārti Annas Babres, Jezupa Danovska, Ontona Kūkoja, Vincas Čepuļa, Alberta Kazuševa, Jōņa Eļkšņa, Līgas Seikstas, Evalda Kluja, Dzidras Bruzgules, A. Piļpukas, Pītera Lōča, Annas Rancānes, Jūlija Tropa, Pītera Keiša, Ilzes Spergas, Inetas Atpiles, Ontona Matvejāna, Andra Vējāna, Venerandas Andžānes, Valerijas Kalves, Konstantina Medņa un daudzu cytu Latgolā zynomu cylvāku roksti, dzeja, stōsti. Īsagrīzit Jōņa Eļkšņa izdevnīceibā, nanūžālōsit: byus, kū laseit, kū pōrdūmōt, ar draugu voi draudzini pōrrunōt, kod byusit izlasejuši.
Māra NIZINSKA
P. S. Redakcija pošreiz apsver sovas īspējas grōmotu “Mōras zeme II” avīzes abonēšonas kampaņas laikā uzdōvynōt myusu uztycamajim laseitōjim — tīm, kuri “Rēzeknes Vēstis” un “Mōras Zemi” laseis ari 2020. godā.
M. N.
Komentāri