Diāna Skaidreite Varslavāne dzymuse Rēzeknē 1932. goda30. augustā dzelžceļnīka un telefonistes giminē. Kod 1944. goda 6. — 7. apreļa naktī sorkonī sabombardēja Rēzekni, jōs ocu prīškā aizgōja būjā vacōki, bet poša meitine tykuse kontuzēta. Diānu ar brōli Rihardu audzynōšonā pījēme Mihalina un Ontons Vaičuli, kurim pošim giminē beja divi mozi bārni. Rakstneica beiguse Rēzeknes Pedagogiskū skūlu, pēc tam Reigas Pedagogiskū institutu, strōdōjuse par latvīšu volūdas un literaturas skūlōtōju. Literarajai darbeibai pīsavārsuse agri, bet nav publicējusēs. Kai roksta Latgolas “Vītejō Avīze”: “… pyrmō publikacija — dzejūļs “Ir uzcelts piemineklis kalnā” laikrokstā “Liesma” (15.12.1967.); pyrmō prozas publikacija — novele “Gredzens” laikrokstā “Literatūra un Māksla” (10.01.1970.). Pyrmō grōmota — autobiografiskais garstōsts “Cilvēks spēlējas ar lāčiem” (1975). Vēļ izdūts garstōsts “Dinas vasara” (1990).” Dzejūli un stōsti izkaiseiti presē, publicēti ari “Tāvu zemes kalendarā”. Literaturas almanahā “Olūts” (1992. un 1999. g.) īvītōts stōsts “Timseņa ausa…”, kas veļteits Latgolas pēckara godu bārnim. Izgōjuši D. S. Varslavānes dzejūļu krōjumi: “Zemes meita” (1997) — dažaidu godu dzeja (1944 — 1997) un “Soneti” (Rēzekne, 2001). Garais stōsts “Dzērvinīki” (2001) ir autobiografisks vēstejums par Latgolas cylvāku liktinim Ūtrō pasaules kara izskaņā un ūtrreizejas padūmu okupacijas sōkuma pūsmā. 2003. godā izdūtas divas grōmotas: “Malnō Marija” un “Saimineica un unuceņš”. Lai Dīva svēteita kotra dīna!
Anita GRAUDIŅA
Komentāri