Rit skaistōkī dzeives godi, dzeivojūt šamā Dīva radeitajā pasaulē. Myusu, Rozentovas Svātō Krysta Pagūdynōšonas bazneicā Dīva gūdam un cylvāku lobā nasavteigi kolpoj myusu cīnejamais prāvests
Rinalds
BROKS
, kuram 22. junī palīk 35 godi. Kolpojūt Dīva dryvā, aizvadeiti gondreiž 11 godi. Cylvāka dzeivē it kai tys ir nalels laika pūsms. Pats sōkums kaut kam lelam. Tūmār padareits daudz. Narunōšu par Viļakas un Raipoles draudzi, kur pr. Rinalds atstōjis naizdzēšamas pādas. Myusu draudzē prīsters dorbojās tikai trešū godu. Taču paveicis ir daudz: ari pošam prāvestam nikas nu rūkom nakreit. Bazneiceņas prīkštelpā, kas ar starpsīnu beja atdaleita nu pōrejōs bazneicas telpas, īkšpusē sīnas klōjōs ar pelējumu. Prīsters ar saiminīka tvērīni stōjōs pi apkures sistemas nūmaiņas un tōs pagarynōšonas leidz ōrejōm durovom, demontēja storpsīnu, īreikōja vējtveri, kas naļaun soltajam ōra gaisam saskarsmē ar syltū radeit kondensatu. Dīvnoms tagad ir sauss, sylts vysā tō plašumā. Visim ticeigajim ir īspēja byut vīnā telpā, nastōvūt aiz sīnas prīkštelpā. Loba, pareiza dūma. Ir rezultats. Ik dīnu apmeklejūt bazneiceņu zīmā, telpōs vīnmār sylts. Par tū ryupejās pats prīsters: reitūs agri ceļās, kurynoj kurtuvi, lai jau ap ostonim byutu sylts. Paļdis par jō ryupem par myusim, vacīm cylvākim. Draudzes gons dora daudz pats ar sovom rūkom, cik ļaun laiks; ceņšās ar draudzes finansialu atbolstu vairōk padareit. Dīvnoms nu īkšpuses ir kōrteibā. Tagad prīstera golvonō ryupe — elektriskōs instalacijas nūmaiņa, kam napīcīšams steidzams rysynōjums. Lyudzamēs un ceram uz Dīvpaleigu. Dīvs prīsteri Rinaldu voda, ceļ spōrnūs. Jys paspēj byut vysur — skūlōs, bibliotekā, muzejā, bārnudōrzā, socialajā mōjā. Vysu maja mēnesi jys kūpā ar ticeigajim lyudzēs pi draudzes krystim. Lyugšonōs vīnmār aicynojūt lyugtīs kotram sovā nūdūmā, bet vysvairōk, izsokūt nūdūmus, aicynōja lyugtīs par pogosta, nūvoda, arī vysas Latvijas ļaudim un jūs vajadzeibom. Lels paļdis prīsteram RINALDAM par kolpōšonu Dīva gūdam un myusu grēceigūs dvēseļu glōbšonai. Paļdis par sadarbeibu ari Kaunatas draudzes prāvestam, myusu prīstera dveiņu brōleišam HARALDAM, kurš brauc pi myusim cīmūs. Vēlejūt vysas Svātō Gora dōvonas, nu sirds sveicu cīnejamūs prīsterus dzimšonas dīnā un prīcojūs kūpā ar prīsteru mameņu, kura ari pīdzymuse 22. junī. Lai Dīva žēlesteiba Jyusus pavoda!
Ar cīnu
Antoņina OSTROVSKA
Komentāri